Մանվել Գրիգորյանին գրավի դիմաց ազատ արձակելու որոշման դեմ բողոքող քաղաքացիներն ակցիա են անցկացնում դատախազության շենքի մոտ
2 րոպեի ընթերցում
![Մանվել Գրիգորյանին գրավի դիմաց ազատ արձակելու որոշման դեմ բողոքող քաղաքացիներն ակցիա են անցկացնում դատախազության շենքի մոտ](http://armenpress.am/resized/480/static/news/b/2018/12/959180.jpg)
ԵՐԵՎԱՆ, 24 ԴԵԿՏԵՄԲԵՐԻ, ԱՐՄԵՆՊՐԵՍ: Ազգային ժողովի պատգամավոր Մանվել Գրիգորյանին գրավի դիմաց ազատ արձակելու որոշման դեմ բողոքող քաղաքացիները բողոքի ակցիա են անցկացնում ՀՀ գլխավոր դատախազության շենքի մոտ: Ինչպես հաղորդում է «Արմենպրես»-ը, բողոքի ակցիան մեկնարկել էր արդարադատության նախարարության շենքի մոտ, որտեղից ակցիայի մասնակիցները շարժվեցին դեպի դատախազության շենք:
Ակցիայի մասնակիցները պահանջում են, որպեսզի Մանվել Գրիգորյանը կրկին կալանավորվի: Նրանք նշում են, որ իրենց պայքարը հանուն օրենքի ու իրավական երկիր ստեղծելու համարէ:
Բողոքի ակցիայի մասնակիցները նաև պահանջում են նաև, որ ՀՀ գլխավոր դատախազը իջնի և հանդիպի դատախազության շենքի դիմաց հավաքված քաղաքացիների հետ:
Երևան քաղաքի ընդհանուր իրավասության դատարանի դատավոր Դավիթ Բալայանը բավարարել էԱզգային Ժողովի պատգամավոր Մանվել Գրիգորյանի պաշտպանական կողմի միջնորդությունը. նա ազատ է արձակվել25միլիոն դրամի գրավի դիմաց:
Մանվել Գրիգորյանին մեղադրանք է առաջադրվել Քրեական օրենսգրքի 235-րդ հոդվածի 2-րդ մասով՝ ապօրինի կերպով ռազմամթերք ձեռք բերելու և այլ անձանց հետ նախնական համաձայնությամբ պահելու համար, ինչպես նաև քրեական օրենսգրքի 179-րդ հոդվածի 3-րդ մասի 1-ին կետով՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու համար:
Հունիսի 16-ին Մանվել Գրիգորյանը ձերբակալվել է, ապա՝ հունիսի 19-ին, Ազգային ժողովի պատգամավորների քվեարկությամբ, զրկվել պատգամավորական անձեռնմխելիությունից ու դատարանի որոշմամբ կալանավորվել:
Կալանքի տակ գտնվելու ընթացքում պատգամավորի պաշտպանները բազմիցս բարձրաձայնել են նրա առողջական խնդիրների մասին՝ նշելով, որ իրենց պաշտպանյալի կյանքին վտանգ է սպառնում: