Քաղաքագետի կարծիքով` ԱԺ արտահերթ ընտրություններին «Իմ քայլը» դաշինքը կհավաքի 50 և ավելի տոկոս ձայն
3 րոպեի ընթերցում
ԵՐԵՎԱՆ, 4 ԴԵԿՏԵՄԲԵՐԻ, ԱՐՄԵՆՊՐԵՍ: Ազգային ժողովի արտահերթ ընտրություններին «Իմ քայլը» կուսակցությունների դաշինքը կունենա ձայների մեծամասնությունը, իսկ երկրորդ ուժը կլինի «Բարգավաճ Հայաստան» կուսակցությունը, երրորդն էլ՝ «Լուսավոր Հայաստան» կամ Հայաստանի Հանրապետական կուսակցությունը:
«Արմենպրես»-ի հաղորդմամբ՝ այս մասին լրագրողների հետ զրույցում նշեց քաղաքագետ Ալեքսանդր Իսկանդարյանը:
«Ցանկացած ընտրապայքարում շատ կարևոր է ունենալ թշնամի, քանի որ, երբ պայքար է ընթանում և կա թշնամի՝ հնարավոր է հավելյալ ձայներ հավաքել այդ պարագայում»,- նշեց Իսկանդարյանը և հավելեց, որ Նիկոլ Փաշինյանի լայն հայտնիությունը պահպանվում է, սակայն փոքր-ինչ անկում նկատվում է:
Նա կասկած չունի, որ «Իմ քայլը» դաշինքը կհավաքի 50 և ավելի տոկոս ձայն:
«Մյուս կողմից էլ՝ ոչ մի կուսակցություն կամ կուսակցությունների դաշինք չի հայտնում, որ «Իմ քայլը» դաշինքի հետ պայքարելու է իշխանության համար: Մի մասն ասում է, որ իրենք համագործակցելու են տվյալ քաղաքական ուժի հետ կամ մյուս մասն էլ՝ թե իրենք ընդդիմադիր ուժ են լինելու»,- ընդգծեց քաղաքագետը:
Իսկանդարյանը երկրորդ շատ ձայներ հավաքելու հավակնորդ ուժ է համարում «Բարգավաճ Հայաստան» կուսակցությանը:
«Գագիկ Ծառուկյանը միշտ շեշտում է այն փաստը, որ ինքը մայրաքաղաքից չէ, այլ այնպիսին է, ինչպիսի կա: Նա ունի իր ավանդական ընտրազանգվածը»,- ասաց Իսկանդարյանը:
Ամենահետաքրքիրը քաղաքագետը համարում է երրորդ ուժ լինելու պայքարը, որը, նրա կարծիքով, ԱԺ-ում կլինի «Լուսավոր Հայաստան» կուսակցությունը կամ Հայաստանի Հանրապետական կուսակցությունը: Իսկանդարյանն այս երկու ուժերին համարում է ամենալուրջ թեկնածուները՝ ԱԺ-ում հայտնվելու համար:
«Արմենպրես»-ի հարցին, թե արտահերթ ընտրություններից հետո խորհրդարանում ո՞ր կուսակցությանը կամ դաշինքին է տեսնում որպես ընդդիմադիր ուժ, քաղաքագետը պատասխանեց, որ դեռևս ոչ մեկին:
«Բոլոր կուսակցություններն ու դաշինքներն ասում են, որ կցանկանան համագործակցել իշխանությունների հետ»,- եզրափակեց Ալեքսանդր Իսկանդարյանը:
Հայաստանում դեկտեմբերի 9-ին տեղի կունենան արտահերթ խորհրդարանական ընտրություններ: Նախընտրական քարոզարշավը մեկնարկել է նոյեմբերի 26-ին և կշարունակվի մինչև դեկտեմբերի 7-ը ներառյալ: