Երևանում անցկացվեց Եվրոպական բիզնես կազմակերպությունների համաշխարհային ցանցի՝ EBO WWN-ի տարեկան համաժողովը
2 րոպեի ընթերցում
![Երևանում անցկացվեց Եվրոպական բիզնես կազմակերպությունների համաշխարհային ցանցի՝ EBO WWN-ի տարեկան համաժողովը](http://armenpress.am/resized/480/static/news/b/2018/11/955878.jpg)
ԵՐԵՎԱՆ, 26 ՆՈՅԵՄԲԵՐԻ, ԱՐՄԵՆՊՐԵՍ: Հայաստանը հյուրընկալել է գործարարների, պետական ու հասարակական գործիչների՝ աշխարհի 40 երկրից, որոնք նոյեմբերի 26-27-ին Երևանում մասնակցում են Եվրոպական բիզնես կազմակերպությունների համաշխարհային ցանցի՝ EBO WWN-ի տարեկան համաժողովին:
«Եվրոպական բիզնես կազմակերպությունների համաշխարհային ցանցի տարեկան համաժողովը անդամ երկրների գործարարների համար Հայաստանի նոր տնտեսական քաղաքականությանը, գործարար ոլորտի զարգացումներին ծանոթանալու շատ լավ հնարավորություն է»,-«Արմենպրես»-ի հաղորդմամբ՝ համաժողովի բացմանն ասաց Եվրոպական բիզնես կազմակերպությունների համաշխարհային ցանցի նախագահ Ռենատո Պաչեկո Նետոն:
Հայաստանում եվրոպական բիզնես ասոցիացիայի նախագահ Դիանա Սարումովան էլ հավելեց, որ անդամակցության երեք տարում կառավարությունը մշտապես համագործակցել է ցանցի հետ՝ բիզնես մթնոլորտի բարելավման նպատակով: «Այսօր էլ պետությունը գործարար հանրության կողքին է՝ պետություն-մասնավոր երկխոսության, ներդրումների համար ավելի բարենպաստ միջավայր ապահովելու նպատակով»,-ասաց նա:
Ինչպես ընդգծեց Հայաստանում ԵՄ պատվիրակության ղեկավար դեսպան Պյոտր Սվիտալսկին՝ նմանատիպ միջոցառումները օգնում են խթանել Հայաստանի իմիջն ամբողջ աշխարհում: «Շատ կարևոր են նաև փորձի փոխանակումն ու տնտեսական քաղաքականության մոտեցումների ձևավորումը»,-ասաց նա: