Փոխնախարարը Հայաստանում հեղափոխությունից հետո արձանագրում է ներդրողների հետաքրքրության բարձրացում
1 րոպեի ընթերցում
ԵՐԵՎԱՆ, 25 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանում ներքաղաքական փոփոխություններից հետո ՀՀ տնտեսական զարգացման և ներդրումների նախարարությունում ներդրողների հետաքրքրության բարձրացում են նկատում:
«Արմենպրես»-ի հաղորդմամբ՝ այս մասին լրագրողների հետ զրույցում փաստեց փոխնախարար Մանե Ադամյանը:
«Ներքաղաքական փոփոխություններն ազդել են ներդրումների վրա: Միանշանակ կարող եմ փաստել, որ ներդրողների կողմից ավելի մեծ հետաքրքրություն կա: Ոլորտները շատ են՝ սպասարկումից մինչև արտադրություն, վերամշակում, բարձր տեխնոլոգիաների ոլորտ»,-նշեց փոխնախարարը:
Նա ասաց, որ նախարարությունում ներդրողների կողմից անհամեմատ ավելի մեծ շարժ են նկատում: Փոխնախարարը նկատեց նաև՝ այս ամենը կյանքի կոչելու համար կարևոր են բարեփոխումները:
«Վստահ եմ, որ խորհրդարանական ընտրություններից հետո հատկապես կլինի ավելի հստակ և ընկալելի միջավայր բոլոր ներդրողների համար»,-նշեց Ադամյանն ու հավելեց՝ ցանկացած ներդրողի համար կարևոր է կայունությունը: