Սեպտեմբերի 11-14-ը պետությունը կբերվի պայմանական պատերազմական վիճակի. մեկնարկում է «Շանթ 2018»-ը
4 րոպեի ընթերցում
ԵՐԵՎԱՆ, 10 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանում սեպտեմբերի 11-14-ն անցկացվելիք «Շանթ 2018» զորավարժություններին կմասնակցեն պետական բոլոր կառույցները: «Արմենպրես»-ի մամուլի սրահում սեպտեմբերի 10-ին տեղի ունեցած մամուլի ասուլիսի ընթացքում այս մասին հայտնեց ՀՀ պաշտպանության նախարարի մամուլի խոսնակ Արծրուն Հովհաննիսյանը:
«Ինչպես 3 տարի առաջ, վաղվանից կունենանք ՀՀ ամբողջ տարածքն ընդգրկող և, գրեթե, բոլոր պետական կառույցների ինչ-որ գործառույթներ ենթադրող հրամանատարաշտաբային զորավարժություն: Կփորձարկենք մեր բոլոր պետական կառույցների ունակություններն ու հմտությունները ամբողջ երկիրը պայմանական պատերազմական վիճակի բերելու դեպքում»,- ասաց Հովհաննիսյանը:
Արծրուն Հովհաննիսյանի խոսքով` զորավարժությունը երկիրը կպատրաստի տարբեր իրավիճակների:
«Զորավարժության սցենարով, ինչպես և անակնկալ քայլերով կստուգենք մեր մարտունակությունը, թե ինչպես ենք արձագանքում իրավիճակի սրմանը, ռիսկերին, զարգացումներին, որոնք չեն լինի միայն հակառակորդի կողմից սահմանին ագրեսիայի տեսքով: Կլինեն նաև բնածին և տեխնածին որոշ աղետների խաղարկային իրավիճակներ: Զորքերի մասսայական կրակային փուլով զորավարժություն չի լինելու, պետական մարմիններն իրականացնելու են իրենց գործառույթները»,- նշեց նա:
«Շանթ 2018»-ի անցկացման հիմնական նպատակը, Արծրուն Հովհաննիսյանի խոսքով, պետական կառավարման մարմինների ողջ համակարգի՝ նոր Սահմանադրության վերապահած լիազորությունների շրջանակում ունակություններն ստուգելն է:
Պաշտպանության նախարարի մամուլի խոսնակը նշում է, որ «Շանթ 2018»-ում կլինեն դրվագներ, որոնց մասին հասարակությունը չի տեղեկանա, իսկ հրապարակման ենթակա տեղեկությունների տարածման հարցում կօգնի տեղեկատվական միասնական կենտրոնը:
«Զորավարժության բաղկացուցիչ մասերից մեկը տեղեկատվական միասնական կենտրոնի ստեղծումն է, որտեղից շատ բաներ հնարավոր կլինի իմանալ, բայց դա չի նշանակում, որ ուժային կառույցներում հընթացս առաջացող խնդիրները բոլորը կլուսաբանվեն: Տարօրինակ կլիներ, եթե դրանք լուսաբանվեին»,- ասաց Հովհաննիսյանը:
Զորավարժությունները կտևեն 3 օր և կանցկացվեն Հայաստանի Հանրապետության ողջ տարածքում: Արծրուն Հովհաննիսյանը նշեց է, որ «Շանթ 2018»-ի ընթացքում զորահավաքին առնչվող քայլեր են տեղի ունենալու, սակայն փակագծեր չբացեց:
«Զորահավաքին առնչվող քայլեր անպայման նախատեսված են, որովհետև հնարավոր չէ երկրում նման մասշտաբի զորավարժություն անցկացնել, որը չառնչվի զորահավաքի հետ»,- նշեց նա:
Համապետական նշանակության «Շանթ-2018» զորավարժությունը պլանային բնույթի է և նպատակաուղղված է պաշտպանությանը պետության անմիջական նախապատրաստության և ագրեսիայի հետմղման ընթացքում պետական և ռազմական կառավարման մարմինների զորահավաքային նախապատրաստության, պատրաստականության բարձր աստիճանների բերման ունակության վերստուգմանը, փոխգործակցության և գործողությունների ներդաշնակության մակարդակի բարձրացմանը: Հաշվի առնելով Հայաստանի շուրջ և մերձատարածքում ստեղծված ռազմաքաղաքական իրադրությունը, զորավարժության սցենարում առկա մտացածին հակառակորդը և իրավիճակը առավելապես համապատասխանեցված են իրականությանը: