Արթուր Դավթյանը հանրության ավելի լայն աջակցություն է ակնկալում մարտի 1-ի բացահայտման գործում
2 րոպեի ընթերցում
ԵՐԵՎԱՆ, 15 ՄԱՅԻՍԻ, ԱՐՄԵՆՊՐԵՍ: Հայաստանի գլխավոր դատախազ Արթուր Դավթյանը երկրում քաղաքական իրավիճակի փոփոխությունից հետո հանրության ավելի լայն աջակցությունն է ակնկալում 2008 թ. մարտի 1-ի դեպքերը բացահայտելու առումով: ՀՀ գլխավոր դատախազն այս մասին ասաց խորհրդարանում լրագրողների հետ զրույցում: «Ես այս փոփոխությունների արդյունքում ավելի շատ հանրային աջակցություն եմ ակնկալում: Օրինակ՝ նախորդ տարվա ընթացքում կոռուպցիայի դեմ պայքարի հարցում մեր հաջողությունների համար մենք պարտական ենք հանրությանը»,- «Արմենպրես»-ի փոխանցմամբ՝ ասաց Դավթյանը:
ՀՀ գլխավոր դատախազը հստակեցրեց, թե ինչ ակնկալիքներ ունի հանրությունից: «Երբ դու հրավիրում ես հարյուրավոր վկաների, հարցաքննում ես, իսկ վկան ասում է, որ տեղեկություններ չունի, սակայն մենք տվյալներ ունենք, որ ինքը կոնկրետ դեպքում տուժողի կողքին է գտնվել, չի կարող գործն առաջ գնալ: Հանրությունը հանդես է գալիս որպես վկա, տուժող, ներկայացնում է իրեն հայտնի տեղեկությունները, ներկայացնում է համապատասխան նյութեր: Վարույթը հենց ցուցմունքների վկաներն են, փորձաքննությունները, ձեռք բերված նյութերը»,- ընդգծեց Դավթյանը:
Հարցին՝ մարտի 1-ի գործով ՀՀ երկրորդ նախագահ Ռոբերտ Քոչարյանը հարցաքննվելո՞ւ է, Արթուր Դավթյանը պատասխանեց. «Երբ լինեն հիմքերը, ցանկացած մեկը քննվելու է՝ ով ուզում է լինի: Ես խնդրում եմ հաշվի առնել, որ վկային հարցաքննության կանչելու համար երկու կարևոր բաղադրիչ կա. առաջինը դրա համար անհրաժեշտ հիմքերն են, մյուսը՝ վարույթ իրականացնող մարմինը ինքն է գնահատում, տակտիկական տեսակետից ելնելով, ո՞ր պահին հարցաքննի՝ այսօր, թե՞ վաղը, թե՞ նյութեր ձեռք բերի, հետո հարցաքննի»: