2 րոպեի ընթերցում
ԵՐԵՎԱՆ, 22, ԱՊՐԻԼԻ, ԱՐՄԵՆՊՐԵՍ: Նկարիչ Վալմարը (Վլադիմիր Մարգարյան) երկխոսությունը կամ բանակցությունները ցանկացած պարագայում ճիշտ է համարում և կողմ է փոխադարձ համաձայնությանը:
«Արմենպրես»-ի հետ զրույցում՝ խոսելով ՀՀ վարչապետ Սերժ Սարգսյանի և Ազգային ժողովի պատգամավոր Նիկոլ Փաշինյանի հանդիպման մասին ՀՀ վաստակավոր և ժողովրդական նկարիչ Վալմարն ասաց, որ նմանատիպ հարցերի հիմքը պետք է լինեն բանակցությունները:
«Ցանկացած պարագայում կարելի է նստել, խոսել և գալ ընդհանուր հայտարարի: Ես չեմ ընդունում ճակատային իրար դեմ դուրս գալը: Սա մեծ ընտանիք է, բոլորս այդ ընտանիքի զավակներն ենք, հողը, ջուրը բոլորինս է, ես կողմնակից եմ փոխադարձ համաձայնության գալուն, որպեսզի առիթից չօգտվեն «մութ» հարևանները։ Պատմության մեջ այդպիսի դեպք չի եղել, որ ճակատային իրար դեմ դուրս գալուց հետո բացասական հետևանքներ չլինեն։ Ամեն ինչի հիմքը պետք է լինեն բանակցությունները, որպեսզի ոչ ոք չտուժի: Բանական մարդիկ, երբ իրար դիմաց նստեն և անկեղծ խոսեն, քննարկեն հարցերը, ամեն ինչն էլ դրական լուծում կարող է ստանալ: Մեծ հաշվով սա անձնական հարց չի, այլ ժողովրդի և հայրենիքի հարցն է»,- ընդգծեց նկարիչը։
Ապրիլի 22-ին կայացավ ՀՀ վարչապետ Սերժ Սարգսյանի և Ազգային ժողովի «Ելք» խմբակցության ղեկավար Նիկոլ Փաշինյանի հանդիպումը: Այն տևեց մի քանի րոպե, ընդհանուր հայտարարի գալ չհաջողվեց: Նիկոլ Փաշինյանը հանդիպումից հետո իր կողմնակիցներին կոչ արեց շարունակել քաղաքացիական անհնազանդության խաղաղ գործողությունները` հայտարարելով, որ ժամը 19:00-ին Հանրապետության հրապարակում կանցկացնեն հերթական հանրահավաքը: Հանդիպումից հետո Նիկոլ Փաշինյանը և նրա կողմնակիցները Հանրապետության հրապարակից երթ սկսեցին դեպի Էրեբունի վարչական շրջան, սակայն Էրեբունիում ոստիկանության տարածքից հեռացրեց Ազգային ժողովի պատգամավորներ Նիկոլ Փաշինյանին, Սասուն Միքայլեյանին և Արարատ Միրզոյանին, ինչից հետո փորձեց ցույցը ցրել այդ հատվածից: