2 րոպեի ընթերցում
ԵՐԵՎԱՆ, 20 ՄԱՐՏԻ, ԱՐՄԵՆՊՐԵՍ: Լույս է տեսել շախմատի Երևանի և Հայաստանի չեմպիոն, ՖԻԴԵ-ի վարպետ, ՀՀ վաստակավոր մարզիչ Գագիկ Հակոբյանի «Օդը, թոթը, լաբատկեն կոթը» մանրապատումների, ինչպես նաև մեծագույն շախմատիստների և քաղաքականության մասին պատմող գիրքը:
«Գրքում առկա են մանրապատումներ, որոնց մասնակիցը կամ ականատեսն եմ ես եղել: Իսկ երկրորդ մասում խոսվում է շախմատի մեծությունների և քաղաքականության մասին: Անդրադարձ կա 4 շախմատիստի`Ռոբերտ Ֆիշերին, Գարրի Կասպարովին, Բորիս Սպասկուն ու Վիկտոր Կորչնոյին, թե ինչպես ընդվզեցին իրենց երկրների իշխանությունների դեմ»,-«Արմենպրես»-ի հետ զրույցում ասաց Հակոբյանը:
Խոսելով գրքի` ոչ շախմատային վերնագրի մասին, Հակոբյանը պատմեց. «Արցախում էի, գյուղերից մեկում հանդիպեցի մի ծերունու, ով բահով աշխատում էր: Մոտեցա, ողջունեցի, և հարցրի, թե քանի տարեկան է: Պատասխանեց, որ 2 տարի առաջ նշել է 100-ամյակը: Իսկ իմ այն հարցին, թե որն է իր երկարակեցության գաղտնիքը, ասաց. «Օդը, թոթը, լաբատկեն կոթը»:
Ընթերցողը կծանոթանա նաև Տիգրան Պետրոսյանին, Ռաֆայել Վահանյանին և Լևոն Արոնյանին նվիրված հեղինակի մտորումներին: Տպագրվել են նաև հատվածներ հեղինակի հոդվածներից, ինչպես նաև ճանաչված լրագրողների մտքերը նրա մասին:
ՀՀ վաստակավոր մարզիչ Գագիկ Հակոբյանը մինչ այս հրատարակել է շուրջ 20 գիրք` շախմատային մեթոդիկաներ, ձեռնարկներ և մենագրություններ: