Միջազգայնագետը Ռուսաստանի նախագահական ընտրություններից հետո ռուս-ամերիկյան հարաբերություններում որեւէ փոփոխություն չի կանխատեսում
2 րոպեի ընթերցում
ԵՐԵՎԱՆ, 12 ՄԱՐՏԻ, ԱՐՄԵՆՊՐԵՍ: Միջազգայնագետ Սուրեն Սարգսյանը Ռուսաստանի Դաշնության նախագահի պաշտոնում որպես ամենահավանական թեկնածու տեսնում է Վլադիմիր Պուտինին: Նրա խոսքով՝ թեպետ Միացյալ Նահանգներում կա որոշակի հույս, որ Ռուսաստանում տեղի կունենան փոփոխություններ, եւ Պուտինը չի վերընտրվի, այնուամենայնիվ, միջազգայնագետը բացառում է այս սցենարը:
«Վլադիմիր Պուտինի վարկանիշը շատ բարձր է: Այսօր նա մրցակիցներ չունի, նույնիսկ ըստ էության, կարելի է ասել, նրա ընտրությունը կանխատեսելի է»,-«Արմենպրես»-ի հաղորդմամբ՝ լրագրողների հետ զրույցում ասաց Սուրեն Սարգսյանը՝ ընդգծելով, որ Ռուսաստանի հայ համայնքը աջակցելու է Վլադիմիր Պուտինին, եւ նա, ինչպես եւ նախորդ ընտրություններին, կանխատեսում է հանդարտ, առանց բախումների ընթացք:
Միջազգայնագետի դիտարկմամբ՝ ԱՄՆ-ի կողմից Ռուսաստանի դեմ պատժամիջոցների երկրորդային ալիքը հարվածելու է նաեւ Հայաստանին եւ Հայաստանի տնտեսությանը:
«Չեմ պատկերացնում, որ ընտրություններից հետո ռուս-ամերիկյան հարաբերություններում որեւէ փոփոխություն կլինի, պատժամիջոցները կպահպանվեն եւ կխորանան: Ոչ մեկի համար գաղտնիք չէ, որ Ռուսաստանը Հայաստանի ռազմավարական դաշնակիցն է, տնտեսական թիվ մեկ գործընկերը, եւ ՌԴ տնտեսական ծանր վիճակը բացասաբար է անդրադառնալու Հայաստանի վրա: Այլ խնդիր է այն, որ ԱՄՆ պատժամիջոցները՝ ուղղված ռազմարդյունաբերության գիգանտների դեմ, միգուցե եւ վտանգ ներկայացնեն Հայաստանի համար, քանի որ ընդամենը մեկ հնարավոր շուկա կա, որտեղից Հայաստանը զենք է ձեռք բերում: Դա Ռուսաստանն է: Այսինքն՝ եթե այդ պատժամիջոցները նաեւ ՌԴ կազմակերպությունների դեմ կիրառվեն, դրա պատճառով՝ նաեւ Հայաստանի, կնշանակի տարածաշրջանում զորքի եւ զինված ուժերի հավասարակշռությունը կխախտվի, ինչը վտանգավոր է, իսկ մեր հարեւանները կօգտվեն դրանից: Ես հույս ունեմ, որ այդ երկրորդ ալիքը չի կիրառվի, եւ հնարավոր կլինի Ռուսաստանից ձեռք բերել ռազմական տեխնիկա՝ չնայած ամերիկյան հնարավոր պատժամիջոցներին»,-եզրափակեց նա: