Թևան Պողոսյանը սիրիական թնջուկի այս փուլում Հայաստանից զգոն քայլեր է ակնկալում
3 րոպեի ընթերցում
![Թևան Պողոսյանը սիրիական թնջուկի այս փուլում Հայաստանից զգոն քայլեր է ակնկալում](http://armenpress.am/resized/480/static/news/b/2018/02/924070.jpg)
ԵՐԵՎԱՆ, 26 ՓԵՏՐՎԱՐԻ, ԱՐՄԵՆՊՐԵՍ: Սիրիան դարձել է աշխարհաքաղաքական բևեռների առճակատման դաշտ, որտեղ հումանիտար աղետը գնալով անտանելի է դառնում, իսկ երկրներն ավելի ու ավելի են ներգրավվում իրենց ուժերի փորձարկումներով:
Այս մասին փետրվարի 26-ին լրագրողների հետ հանդիպմանն ասաց նախկին պատգամավոր, «Մարդկային զարգացման միջազգային կենտրոնի» նախագահ Թևան Պողոսյանը: «Սիրիայում ներկայում լիակատար պատերազմական իրավիճակ է, որտեղ զոհերի քանակը ոչ թե տասնյակներով է չափվում, այլ հարյուրներով ու հազարներով, նոր զինատեսակների ու մարտավարությունների փորձարկում է տեղի ունենում մի երկրում, որտեղ հումանիտար ճգնաժամն անցել է բոլոր սահմանները: Մի երկիր, ուր անցած տարի Հալեպն էր ռմբակոծվում, այս տարի Արևելյան Գութայի, Դեր Զորի ռմբակոծության խնդիրների մասին է բարձրաձայնվում»,-«Արմենպրես»-ի հաղորդմամբ` ասաց փորձագետը:
Նրա խոսքով` ԱՄՆ-ն ու Ռուսաստանը դեռևս դիվանագիտական հայտարարությունների տեսքով են ուղերձներ փոխանցում և ռազմական գործողությունները վերագրում են ոչ պետական ուժերին: Իսկ Թուրքիան, ըստ Պողոսյանի, օգտվելով ԱՄՆ-Ռուսաստան առճակատումից, փորձում է իր շահերն առաջ տանել ու պայքար մղել քրդերի դեմ: «Մենք տեսանք, որ ՄԱԿ-ում անվտանգության խորհուրդը 30-օրյա զինադադարի մասին բանաձև ընդունեց, սակայն դրանից հետո ևս կողմերը քաղաքական ասպեկտում հայտարարություններով սկսեցին իրար մեղադրել և պնդել, որ շարունակելու են պայքարը «Իսլամական պետության» դեմ»,-ավելացրեց Թևան Պողոսյանը:
Փորձագետն այս իրավիճակում Հայաստանից ակնկալում է զգոն և ուշադիր քայլերի իրականացում, քանի որ ռազմական թատերաբեմը Հայաստանից ոչ մեծ հեռավորության վրա է, դրան գումարած՝ նաև Սիրիայում հայկական համայնքի անվտանգության ապահովման հարցերը: Նրա դիտարկմամբ` բացառված չէ իրավիճակը, որ աշխարհն այլևս չվերագտնի կայունությունն, ու խնդիրն ընդլայնի իր աշխարհագրությունը: «Իրականության մեջ «Իսլամական պետությունը» չի հաղթահարվել, այն գոյություն ունի, և մենք պետք է ուշադիր ու զգոն լինենք մեր երկրի ու սահմանների անվտանգության հարցերի նկատմամբ: Զարգացումներին հետևելուց բացի ճիշտ սցենարներ մշակենք, որպեսզի Սիրիայում ապրող մեր հայրենակիցներին օգնության ձեռք մեկնենք` առնվազն նրանց այնտեղից դուրս բերելով»,-հավելեց բանախոսը: