2 րոպեի ընթերցում
ԵՐԵՎԱՆ, 8 ՀՈՒՆՎԱՐ, ԱՐՄԵՆՊՐԵՍ: Շախմատի Հայաստանի տղամարդկանց 78-րդ առաջնությանը կմասնակցի 11 շախմատիստ, իսկ կանանց մրցաշարին` 10:
Այս մասին «Արմենպրես»-ի հետ զրույցում ասաց Հայաստանի շախմատի ֆեդերացիայի գլխավոր քարտուղար Միքայել Անդրիասյանը: «Տղամարդկանց մրցաշարին կմասնակցի 9 գրոսմայստեր և 2 միջազգային կարգի վարպետ: Ստացվելու է այնպես, որ մեկը մրցաշարի ընթացքում հանգստի ավելի օր կունենա: Իսկ կանանց մրցաշարը վերջին տարիներին ամենաուժեղ կազմ է հավաքել»,-ասաց Անդրիասյանը:
Այս տարի Հայաստանի առաջնությունում ամենաբարձր վարկանիշն ունի Տիգրան Պետրոսյանը (2606): Առաջնությանը կմասնակցեն նաև Հայկ Մարտիրոսյանը, Ռոբերտ Հովհաննիսյանը, Զավեն Անդրիասյանը, Կարեն Գրիգորյանը, Արման Փաշիկյանը, Հովհաննես Գաբուզյանը, Մանուէլ Պետրոսյանը, Սամվել Տեր-Սահակյանը, Շանթ Սարգսյանը, Տիգրան Հարությունյանը: Կանանց մրցաշարին կմասնակցի 10 շախմատիստ:
Հայաստանի տղամարդկանց 78-րդ եւ կանանց 73-րդ առաջնությունները կանցկացվեն 2018 թվականի հունվարի 11-23-ը Երևանում` Տ. Պետրոսյանի անվան շախմատի տանը: Մրցաշարերն անցկացվում են շրջանային մրցակարգով:
Կանոնադրության համաձայն` մրցաշարերում լավագույն արդյունք ցույց տված շախմատիստները կընդգրկվեն ազգային հավաքականների կազմեր: Տղամարդկանց առաջնության գլխավոր մրցավարն է միջազգային կարգի մրցավար Աշոտ Վարդապետյանը, իսկ կանանցը` միջազգային կարգի մրցավար Ջուլիետա Նահատակյանը: