Տիգրան Պետրոսյան «Ծաղկաձոր օփեն»-ի առաջատարներից հետ է մնում կես միավորով

ԵՐԵՎԱՆ, 1 ԴԵԿՏԵՄԲԵՐԻ, ԱՐՄԵՆՊՐԵՍ: Ծաղկաձորում ընթացող շախմատային միջազգային մրցաշարում կայացան 8-րդ տուրի պարտիաները:

«Արմենպրես»-ի հաղորդմամբ` «Ծաղկաձոր օփեն»-ի անդրանիկ մրցաշարը մոտենում է ավարտին: 8-րդ տուրում Հայաստանի ներկայացուցիչներից հաղթանակ տոնեցին Տիգրան Պետրոսյանը, Արման Փաշիկյանը, Հովիկ Հայրապետյանը, Շանթ Սարգսյանը: Ոչ-ոքի ավարտեցին իրենց պարտիան Ռոբերտ Հովհաննիսյանը, Արամ Հակոբյանը, Հովհաննես Գաբուզյանը:

Այս տուրից հետո 6,5 միավորով առաջատարներն են Մարին Բոսիոչիչը և Վիտալի Վերնադսկին: Տիգրան Պետրոսյանն ունի 6 միավոր:

Նոյեմբերի 22-ից դեկտեմբերի 2-ը Հայաստանի շախմատի ակադեմիան Հայաստանի շախմատի ֆեդերացիայի հետ համատեղ անցկացնում է «Ծաղկաձոր օփեն» շախմատի միջազգային մրցաշար, որը տեղի է ունենում «Ծաղկաձոր Մարիոթ» հյուրանոցում: Մրցաշարն անցկացվում է Ա և Բ խմբերով, շվեյցարական մրցակարգով, 9 խաղափուլով՝ ՖԻԴԵ-ի շախմատի կանոնների համաձայն: Մրցաշարերում հաղթողի կոչման համար կպայքարեն 17 երկրի շուրջ 160 շախմատիստ, այդ թվում՝ 23 միջազգային գրոսմայստեր, 23 միջազգային և ՖԻԴԵ-ի վարպետներ: Մրցաշարի մրցանակային ֆոնդը կազմում է 12 000 ԱՄՆ դոլար: Սահմանված են 15 հիմնական և 10 հատուկ մրցանակներ: Ծաղկաձորի բաց մրցաշարին մասնակցում են շախմատիստներ Հայաստանից, Ռուսաստանից, Ուկրաինայից, Բելառուսից, Ղազախստանից, Վրաստանից, Ուզբեկստանից, Լիտվայից, Ֆրանսիայից, Բրազիլիայից, Խորվաթիայից, Չեխիայից, Իսրայելից, Հնդկաստանից, Չինաստանից, Իրանից և ԱՄՆ-ից: