396.41
Էդիկ Մինասյանը պատմական իրադարձություն է համարում Հայաստան-ԵՄ համաձայնագրի ստորագրումը
2 րոպեի ընթերցում
ԵՐԵՎԱՆ, 29 ՆՈՅԵՄԲԵՐԻ, ԱՐՄԵՆՊՐԵՍ: Եվրամիության և Հայաստանի միջև Համապարփակ և ընդլայնված համաձայնագրի ստորագրումը բխում է հայ ժողովրդի ազգային և պետական շահերից:
«Արմենպրես»-ի հաղորդմամբ` նոյեմբերի 29-ին լրագրողների հետ զրույցում նման կարծիք հայտնեց պատմաբան Էդիկ Մինասյանը:
«Եվրամիության և Հայաստանի միջև համաձայնագիրը շատ կարևոր պատմական փաստաթուղթ է մեր երկրի համար: Հայաստանի Հանրապետությունը ոչ միայն խորացնում է հարաբերությունները Եվրամիության հետ, այլ նաև հնարավորություն է ստանալու անմիջական շփում ունենալ եվրոպական արժեքների և քաղաքակրթության հետ: Բացի այդ, համագործակցությունը տեխնիկական աջակցության, տնտեսական զարգացման լայն հեռանկարներ է ստեղծում, ինչու չէ, նաև վիզայի ազատականացման հնարավորություն: Այդ ամենը բխում է մեր պետական և ազգային շահերից»,- ասաց Մինասյանը:
Ըստ պատմաբանի` այս համաձայնագրի ստորագրումը միջազգային ասպարեզում Հայաստանի կողմից հաջող իրականացված համադրման քաղաքականության պտուղն է:
Մինասյանի կարծիքով` Հայաստանն իր պատմության մեջ ունի բազմաթիվ դեպքեր, որտեղ համադրման քաղաքականությունն իր արդյունքը տվել է:
«Հայ ժողովրդի պատմությունից առանձին դեպքեր և իրադարձություններ կարելի է մատնանշել, երբ համադրման քաղաքականությունն իր արդյունքը տվել է` Տիգրան Մեծի, Թեոդորոս Ռշտունու, Աշոտ Առաջին Բագրատունու ժամանակաշրջանում: Այս փաստերը ներկայացնելով՝ կարող ենք ցույց տալ, որ ԵՄ-ի հետ համաձայնագրի ստորագրումը մեր դիվանագիտական ձեռքբերումներից է»,- եզրափակեց Մինասյանը:
Բաժանորդագրվեք մեր ալիքին Telegram-ում