Ծաղկաձորի բաց մրցաշարի առաջատարը Ուկրաինայի ներկայացուցիչ է 

ԵՐԵՎԱՆ, 27 ՆՈՅԵՄԲԵՐԻ, ԱՐՄԵՆՊՐԵՍ: Ծաղկաձորում ընթացող շախմատային միջազգային մրցաշարում կայացան 4-րդ տուրի պարտիաները:

«Արմենպրես»-ի հաղորդմամբ` Հայաստանի ներկայացուցիչներից Ռաֆայել Վահանյանը ոչ-ոքի խաղաց, իսկ Հովհաննես Գաբուզյանը պարտություն կրեց: Հովիկ Հայրապետյանը, Արամ Հակոբյանը հաղթանակներ տոնեցին այս տուրում:

Այս տուրից հետո 4 հնարավորից 4 միավորով մրցաշարային աղյուսակի առաջատարը Վիտալի Բերնադսկին է:

Նոյեմբերի 22-ից դեկտեմբերի 2-ը Հայաստանի շախմատի ակադեմիան Հայաստանի շախմատի ֆեդերացիայի հետ համատեղ անցկացնում է «Ծաղկաձոր օփեն» շախմատի միջազգային մրցաշար, որը տեղի է ունենում «Ծաղկաձոր Մարիոթ» հյուրանոցում: Մրցաշարն անցկացվում է Ա և Բ խմբերով, շվեյցարական մրցակարգով, 9 խաղափուլով՝ ՖԻԴԵ-ի շախմատի կանոնների համաձայն: Մրցաշարերում հաղթողի կոչման համար կպայքարեն 17 երկրի շուրջ 160 շախմատիստ, այդ թվում՝ 23 միջազգային գրոսմայստեր և 23 միջազգային և ՖԻԴԵ-ի վարպետներ: Մրցաշարի մրցանակային ֆոնդը կազմում է 12 000 ԱՄՆ դոլար: Սահմանված են 15 հիմնական և 10 հատուկ մրցանակներ: Ծաղկաձորի բաց մրցաշարին մասնակցում են շախմատիստներ Հայաստանից, Ռուսաստանից, Ուկրաինայից, Բելառուսից, Ղազախստանից, Վրաստանից, Ուզբեկստանից, Լիտվայից, Ֆրանսիայից, Բրազիլիայից, Խորվաթիայից, Չեխիայից, Իսրայելից, Հնդկաստանից, Չինաստանից, Իրանից և ԱՄՆ-ից: