1 րոպեի ընթերցում
ԵՐԵՎԱՆ, 21 ՀՈՒԼԻՍԻ, ԱՐՄԵՆՊՐԵՍ: Երուսաղեմում արդեն երրորդ օրն է, ինչ շարունակում են բախումները արաբ երիտասարդների և իսրայելական ոստիկանության միջև: Ինչպես հաղորդում է «Արմենպրես»-ը՝ վկայակոչելով «ՌԻԱ Նովոստի»-ն, բախումների պատճառ է դարձել Տաճարի լեռան տարածքում Իսրայելի ոստիկանության սահմանած նոր անվտանգության կանոնները:
Մետաղորսիչների տեղադրումից զայրացած արաբ երիտասարդները նախաձեռնել են անցած երեք օրերի ամենազանգվածային բախումները: Տաճարի լեռը կարևորագույն սրբավայր է ինչպես հրեաների, այնպես էլ մուսուլմանների համար: Այդ տարածքում են գտնվում հին հրեական տաճարի ավերակները և Ալ Ակսա ու Կուբաթ աս-Սահրա մզկիթները:
Իսրայելի առողջապահության նախարարությունը հայտնել է, որ այսօրվա բախումների հետևանքով մահացել է 18-ամյա Մուհամեդ Լաֆին, ով մահացել է հրազենային վնասվածքից: