Էդգար Մանուչարյանը խոսել է «Լոկոմոտիվ»-ի դեմ խաղի և իր կարմիր քարտի մասին
1 րոպեի ընթերցում
![Էդգար Մանուչարյանը խոսել է «Լոկոմոտիվ»-ի դեմ խաղի և իր կարմիր քարտի մասին](http://armenpress.am/resized/480/static/news/b/2017/05/889152.jpg)
ԵՐԵՎԱՆ, 3 ՄԱՅԻՍԻ, ԱՐՄԵՆՊՐԵՍ: Հայաստանի ֆուտբոլի ազգային թիմի անդամ Էդգար Մանուչարյանն անդրադարձել է Ռուսաստանի գավաթի եզրափակիչի «Ուրալ»-«Լոկոմոտիվ» խաղին, որտեղ կարմիր քարտ էր ստացել:
«Չեմ կարող ասել, որ «Լոկոմոտիվ»-ն արժանի էր հաղթանակի, սակայն մենք կարծես հոգնել էինք, և այդ պատճառով էլ մրցակիցը գոլեր խփեց: Մեզ ավելի մեծ վստահություն էր պետք, գուցե փորձի պակասն էր, որ իրենն արեց»,-«Արմենպրես»-ի հաղորդմամբ` ասել է Մանուչարյանը:
Հայ ֆուտբոլիստը խոսել է նաև խաղավարտին տեղի ունեցած ծեծկռտուքի մասին. «Բոլոր հեռացումները արժանի էին: Այս ամենը զգացմունքայնության արդյունք է, առանց որի ֆուտբոլը չես կարող պատկերացնել»,-ասել է նա:
Ռուսաստանի ֆուտբոլի գավաթի եզրափակիչում Եկատերինբուրգի «Ուրալ»-ը, որի կազմում հանդես է գալիս Հայաստանի ազգային հավաքականի հարձակվող Էդգար Մանուչարյանը, 0:2 հաշվով պարտվեց Մոսկվայի «Լոկոմոտիվ»-ին և զրկվեց պարգևից: Հանդիպման ավարտին մոտ` ավելացված երրորդ րոպեին, երկու թիմերի ֆուտբոլիստների միջև ծեծկռտուք սկսվեց, ինչի պատճառով մրցավարը խաղադաշտից հեռացրեց թիմերի երկուական ֆուտբոլիստների, այդ թվում` Էդգար Մանուչարյանին: