ՀՀ-ն ու ԱՄԷ-ն ավելացրել են առևտրի ծավալները. ներդրողներն ուղղվում են Հայաստանի տնտեսության նոր ու շահութաբեր ոլորտներ
8 րոպեի ընթերցում
![ՀՀ-ն ու ԱՄԷ-ն ավելացրել են առևտրի ծավալները. ներդրողներն ուղղվում են Հայաստանի տնտեսության նոր ու շահութաբեր ոլորտներ](http://armenpress.am/resized/480/static/news/b/2017/03/883550.jpg)
ԱԲՈՒ ԴԱԲԻ, 22 ՄԱՐՏԻ, ԱՐՄԵՆՊՐԵՍ: Արաբական Միացյալ Էմիրությունների և Հայաստանի Հանրապետության միջև առևտրաշրջանառության ծավալներում զգալի աճ է նկատվում: Պետությունների միջև ոչ նավթային, այդ թվում՝ ազատ գոտիների առևտրի ընդհանուր ծավալը 2015թ. կազմել է 102 միլիոն դոլար, մինչդեռ 2016թ. առաջին ինն ամիսներին այդ ցուցանիշը հասել է 88,3 միլիոնի: Այս մասին հայտարարել է ԱՄԷ էկոնոմիկայի նախարար Սուլթան բին Սայիդ Ալ Մանսուրին Աբու Դաբիում «Հայաստան-Արաբական Միացյալ Էմիրություններ» ներդրումային համաժողովի ընթացքում, որի բացման արարողությանը մասնակցում էր նաև ՀՀ Նախագահ Սերժ Սարգսյանը: Սուլթան ալ-Մանսուրին առևտրի ծավալների աճը համարում է երկու երկրների միջև տնտեսական փոխգործակցության ընդլայնման վկայություն:
«Այնուամենայնիվ, կարծում ենք, որ այդ ցուցանիշները չեն համապատասխանում քաղաքական հարաբերությունների մակարդակին, չեն արտացոլում պոտենցիալ և հասանելի հնարավորությունները և չեն կարող բավարարել երկու պետությունների ժողովուրդների և ղեկավարությունների ձգտումները»,-«Արմենպրես»-ի հաղորդմամբ՝ նկատել է նախարարը:
Նրա խոսքով՝ մարտահրավերներով լի միջազգային տնտեսության իրականության մեջ Էմիրություններն աշխարհում առաջին նավթարդյունաբերող երկրներից էր, որը կարևորություն տվեց տնտեսության դիվերսիֆիկացմանը և որպես եկամտի աղբյուրի նավթի արտահանման վրա շեշտը դնելու փոխարեն սկսեց աշխատել իր տնտեսական հիմքի բազմազանեցման և տնտեսության կայուն սեկտորների շարունակական զարգացման ուղղություններով՝ ոչ նավթային սեկտորի բաժնեմասը հասցնելով երկրի ՀՆԱ-ի մոտ 70 տոկոսին:
«Երկրի կառավարությունը որդեգրել է զարգացման հստակ ռազմավարություն, որի կարևորագույն մասն են պետության իրավասու օղակների կողմից ուղղորդվող գիտելիքի և նորարարությունների հիման վրա կառուցվող մրցունակ գլոբալ տնտեսություն: ԱՄԷ կառավարությունը մտադիր է ապահովել տնտեսական գործունեության բարենպաստ միջավայր՝ գործի դնելով տնտեսական աճը խթանող օրենքներ և շարունակաբար ձգտելով ներդրումային միջավայրի բարելավմանը, աշխատելով տնտեսության առավել կայուն սեկտորների զարգացման ուղղությամբ: Այդ ռազմավարության շնորհիվ Էմիրությունները կարողացան առաջատար դիրքեր գրավել թե որպես երկրորդ խոշորագույն տնտեսություն ունեցող արաբական պետություն, թե որպես տարածաշրջանի և համաշխարհային մակարդակով ներդրումների, ֆինանսների, տուրիզմի, լոգիստիկայի կենտրոն»,-ասել է Սուլթան բին Սայիդ Ալ Մանսուրին՝ երկրում օտարերկրյա կապիտալի համար ամենակարևոր երաշխիքը համարելով քաղաքական կայունությունը, տնտեսական ուժը, սոցիալական ապահովությունը և օրենքի գերակայությունը: Նա հայաստանյան գործարարներին հրավիրել է օգտվելու զարգացման լայն խթաններից՝ որպես ներդրումների համար կարևորագույն ոլորտներ ընդգծելով փոքր և միջին ձեռնարկությունները, արդյունաբերությունը, տուրիզմն ու հյուրընկալությունը, ֆինանսական ծրագրերը, անշարժ գույքը, շինարարությունը, առևտուրը:
«Մինչ ընդգծում ենք, որ հայ ներդրողը ողջունելի կլինի Էմիրություններում և կվայելի հաջողության հասնելու համար անհրաժեշտ լիարժեք աջակցություն և համագործակցություն, մենք շարունակում ենք զորակցություն ցուցաբերել էմիրաթական ընկերություններին, որոնք ցանկանում են ուղղվել դեպի Հայաստանի տնտեսության նոր, ակտիվ ու շահութաբեր ոլորտներ՝ վստահ լինելով, որ կգտնեն այն միջոցները, որոնք անհրաժեշտ են տնտեսական ակտիվության և բարեկամ երկրում ներդրումներն ընդլայնելու համար»,-ընդգծել է ԱՄԷ էկոնոմիկայի նախարարը:
Նա, ողջունելով ՀՀ Նախագահ Սերժ Սարգսյանին, նշել է, որ մեծ պատիվ է ներկա գտնվել այս նորարարական ֆորումին, որը կարևորագույն հարթակ է ԱՄԷ և Հայաստանի Հանրապետության միջև տնտեսական կապերի զարգացման գործում: Այս միջոցառումը հովանավորելու կապակցությամբ նա շնորհակալություն է հայտնել Աբու Դաբիի Թագաժառանգ և ԱՄԷ Զինված ուժերի գերագույն գլխավոր հրամանատարի տեղակալ Շեյխ Մոհամմադ բին Զայեդ Ալ Նահյանին, ով պատիվ ունի հյուրընկալելու ՀՀ Նախագահ Սերժ Սարգսյանին:
«Երկու կողմերի ներկայությունն ու արժանավայել հովանավորությունը վկայում են ՀՀ և ԱՄԷ միջև երկկողմ բարիդրացիական կապերի առկայության մասին և արտացոլում են երկու երկրների ղեկավարությունների համատեղ ցանկությունը բարձրացնելու այդ հարաբերությունների մակարդակը նոր փուլի: ԱՄԷ ղեկավարությունը որդեգրել է աշխարհի պատմական երկրների առաջ բաց լինելու քաղաքականություն և հույժ կարևորություն է տվել բոլոր գործընկերների միջև ամուր տնտեսական կապեր հաստատելուն՝ հիմնվելով փոխադարձ հարգանքի և ընդհանուր շահերի իրագործման վրա: Այդ սկզբունքների հիմքում ընկած են այնպիսի ուղիներ, որոնք կամրապնդեն գործընկերների մրցունակությունն արտաքին շուկաներում և կծառայեն նրանց ներդրումային և առևտրային շահերին, ինչպես տարածաշրջանային, այնպես էլ միջազգային շուկաներում»,-ասել է Սուլթան բին Սայիդ Ալ Մանսուրին:
Նրա խոսքով՝ ԱՄԷ և ՀՀ միջև դիվանագիտական հարաբերությունների հաստատման պահից՝ 1998թ. հունիսից սկսած` երկկողմ հարաբերություններն ապրել են զգալի աճ և առաջընթաց, հաստատուն կերպով բարգավաճելով և հիմնվելով փոխադարձ հարգանքի վրա:
«Զարգացման ճանապարհին մեր հարաբերութուններն ունեցել են մի քանի հանգուցակետ. այդ հանգուցակետերից առավել նշանակալին 2016թ. ՀՀ Նախագահ Սերժ Սարգսյանի այցն է ԱՄԷ և այցի շրջանակում տեղի ունեցած առանձնազրույցները, որոնց ընթացքում քննարկվել են տնտեսական զարգացման և ներդրումների ասպարեզում երկկողմ հարաբերությունների ամրապնդման և առևտրային փոխանակումների ընդլայնման, ներկայիս փոխգործակցության խթանման հարցեր»,-նշել է ԱՄԷ էկոնոմիկայի նախարարը՝ այսօրվա նախադեպ ֆորումը համարելով այդ հանդիպումներում ձեռք բերված պայմանավորվածությունների գործնական իրագործման կատարյալ հարթակ, որտեղ հնարավոր կլինի առավել խորացնելու ԱՄԷ և ՀՀ գործնական կապերը:
Հայաստանի զարգացման հիմնադրամի և Աբու Դաբիի Առևտրի պալատի կազմակերպած համաժողովը նպատակ ունի խթանելու Հայաստանի և արաբական երկրների տնտեսական կապերի ակտիվացումը, գործարարների միջև շփումները, ներկայացնելու Հայաստանի ներդրումային միջավայրը և տարբեր ոլորտներում փոխշահավետ ներդրումային նախագծեր: Համաժողովի շուրջ 300 մասնակիցների թվում են պետական պաշտոնյաներ, հիմնադրամների ղեկավարներ, վերազգային ընկերությունների, միջազգային կազմակերպությունների, Հայաստանում օտարերկրյա ներդրումների հաջող փորձ ունեցող ընկերությունների ներկայացուցիչներ։