Եվրոպացի պատգամավորների նկատմամբ հետապնդումը Ադրբեջանի քաղաքական հիստերիայի նշան է. Լարիսա Ալավերդյան
3 րոպեի ընթերցում
ԵՐԵՎԱՆ, 23 ՓԵՏՐՎԱՐԻ, ԱՐՄԵՆՊՐԵՍ: Արցախ այցելելու համար եվրոպացի պատգամավորների նկատմամբ միջազգային հետապնդում հայտարարելն Ադրբեջանի իշխանությունների քաղաքական հիստերիայի նշան է: «Արմենպրես»-ի մամուլի սրահում հրավիրված ասուլիսում նման կարծիք հայտնեց ՀՀ մարդու իրավունքների նախկին պաշտպան, «Ընդդեմ իրավական կամայականության» ՀԿ գործադիր տնօրեն Լարիսա Ալավերդյանն` անդրադառնալով Ադրբեջանի կողմից Եվրախորհրդարանի պատգամավորների նկատմամբ միջազգային հետախուզում հայտարարելու փաստին:
«Դա, իհարկե, քաղաքական հիստերիայի նշան է: Նրանք նույնիսկ իրենց լրատվամիջոցներում կեղծ թվեր էին ներկայացնում Արցախ այցելած դիտորդների մասին` ասելով, թե Լապշինի ազդեցությունն է: Բայց դրանից զատ, այս ամենը խոսում է այն մասին, թե միջազգային իրավունքի լուրջ գործիքը բարբարոսի ձեռքում ինչպես է խեղաթյուրվում»,-ասաց Լարիսա Ալավերդյանը:
«Սովորական ցեղասպանություն» նախագծի համակարգող Մարինա Գրիգորյանը նշեց, որ ինքն առիթ ունեցել է եվրոպացի պատգամավորների հետ շփվելու, վստահ է, որ նրանք շարունակելու են այցելել Արցախ, ինչպես դա արել են տարիներ առաջ:
«Ես չեմ կարծում, որ իրականում եվրոպացի պատգամավորները կարտահանձնվեն, սա ավելի շատ ցուցադրական, քարոզչական քայլ է: Մենք չգիտենք, թե դա ինչ ազդեցություն կունենա հետագայում, բայց ես համոզված եմ, որ այս պատգամավորները, ովքեր շատ ազնիվ, սկզբունքային գործիչ են, կշարունակեն այցելել Արցախ»,-ասաց Մարինա Գրիգորյանը:
Լարիսա Ալավերդյանի խոսքով, Ադրբեջանը խելքի չի գա: Ըստ նրա` բավական է ասենք, որ բարբարոսության ուղին բռնած պետությունը խելքի կգա: «Դա իր ոճն է, որը ձեռք է բերել 1918 թվականից: Նման դեպքերում մենք պետք է հետևողական լինենք, քաղաքական օրակարգի հարց դարձնենք: Նախաձեռնող կողմը մենք պետք է լինենք»,-ասաց Լարիսա Ալավերդյանը: Նա ընդգծեց, որ աշխատանքը պետք է տարվի բոլոր հարթակներում միասնական` քաղաքական, քարոզչական, իրավական և այլն:
Ադրբեջանական լրատվամիջոցները հայտնում են, որ այդ երկիրը միջազգային հետախուզում է հայտարարել Եվրախորհրդարանի պատգամավորներ Ֆրանկ Էնգելի` Լյուքսեմբուրգ, Էլենի Թեոխարուսի` Կիպրոս, Յարոմիր Շտետինայի` Չեխիա, նկատմամբ: