3 րոպեի ընթերցում
ԵՐԵՎԱՆ, 8 ՆՈՅԵՄԲԵՐԻ, ԱՐՄԵՆՊՐԵՍ: Հայտնի է, որ «Մանկական եվրատեսիլ-2016» երգի միջազգային մրցույթին Հայաստանը ներկայացնելու է Մերի Վարդանյան- Անահիտ Ադամյան դուետը: Այս առիթով «Արմենպրես»-ը զրուցեց Մերիի և Անահիտի հետ:
- Որքա՞ն ժամանակ եք զբաղվում երաժշտությամբ: Երաժշտական ո՞ր ուղղությունն եք ձերը համարում և կպատմե՞ք այն մրցույթների մասին, որոնց մասնակցել եք:
Անահիտ- Փոքր տարիքից սիրել եմ երգել և մտածել եմ մեծ բեմերի մասին: Երաժշտական առաջին լուրջ քայլերս սկսել եմ 2013-ից՝ սովորելով Սոչիում եւ Հայաստանում: Ինչ վերաբերում է մրցույթներին, ապա նշեմ, որ Ռուսաստանում մասնակցել եմ մանկական «Գոլոս» նախագծի ընտրական փուլին, ինչպես նաև Իգոր Կրուտոյի ակադեմիայի «Բիտվա Տալանտով»նախագծին, որտեղ դարձել եմ եզրափակիչի մասնակիցներից մեկը ու շատ տպավորված էի և ուրախ:
Մերի- Երաժշտական պրոֆեսիոնալ առաջին քայլերն արել եմ 2011 թվականին և սկսել եմ ուսանել «ԷՄԻ-ԲԻ» պրոդյուսերական ընկերության «Դո-Ռե-Մի» վոկալ դպրոցում: Մասնակցել եմ երաժիշտ-կատարողների «Վերածնունդ» միջազգային մրցույթ-փառատոնին, արժանացել գլխավոր մրցանակի: Մեծ հաճույք է ինձ պատճառել այդ հաղթանակը: Առաջին մրցանակի եմ արժանացել նաև «Ազգերի բարեկամություն» առաջին միջազգային մրցույթում:
- Ի՞նչ զգացողություններ ունեցաք, երբ պարզ դարձավ, որ ներկայացնելու եք Հայաստանը «Մանկական եվրատեսիլ» երգի միջազգային մրցույթում:
Անահիտ– Երբ զանգահարեցին ու ասացին, որ ես եմ ընտրվել, մայրիկիս հետ տաքսու մեջ էինք: Ես շատ ուրախացա, իսկ մայրիկս նույնիսկ հուզվեց, հետո նկատեցինք, որ տաքսու վարորդն էլ է ուրախացել:
Մերի– Առաջին հերթին պատասխանատվության մեծ, շատ մեծ զգացում ապրեցի: Ինձ համար շատ պարտավորեցնող էր այն հանգամանքը, որ ես եմ ներկայացնելու Հայաստանը: Նման մեծ մրցույթում ամեն մեկին չէ, որ բախտ է վիճակվում ներկայացնել իր երկիրը:
- Չե՞ք վախենում պատասխանատվությունից:
Անահիտ- Չէ, վստահ ենք, որ լավ ենք ելույթ ունենալու:
Մերի- «Մանկական եվրատեսիլ»-ն առաջին հերթին տոն է: Այդ պատճառով չենք հուզվում: Ամեն ինչ լավ է լինելու:
- Ծանո՞թ եք ձեր մրցակիցներին: Ի՞նչ ակնկալիքներ, սպասելիքներ ունեք մրցույթից:
Անահիտ– Այս տարի մեզ լուրջ մրցակցություն է սպասում, բոլոր մասնակիցները վոկալային լավ տվյալներ ունեն: Ինձ ավելի շատ դուր են եկել Մալթայի եւ Ռուսաստանի երգերը, այդ երկրները ներկայացնող երգիչներին ես համարում եմ մեզ մրցակիցներ:
Մերի– Բոլոր երգիչներն էլ լավն են և շատ պատրաստված: Յուրաքանչյուրը կարող է լինել հաղթող այս տարի, սակայն կարծում եմ՝ մեր երգը իր դինամիկայով առանձնանում է: Որպես մրցակից տեսնում եմ Մալթայի եւ Նիդերլանդների ներկայացուցիչներին, որոնց երգերը շատ եմ հավանել: