2 րոպեի ընթերցում
ԵՐԵՎԱՆ, 7 ՆՈՅԵՄԲԵՐԻ, ԱՐՄԵՆՊՐԵՍ: Իրաքի Մոսուլ քաղաքում առկա ռազմական և քաղաքական իրավիճակը բավականին խճճված է: «Արմենպրես»-ի հաղորդմամբ՝ նոյեմբերի 7-ին լրագրողների հետ հանդիպման ժամանակ նշեց «Կովկաս» ինստիտուտի տնօրեն քաղաքագետ Ալեքսանդր Իսկանդարյանը:
Ըստ նրա՝ Մոսուլի ազատագրման համար կազմված կոալիցիան բավականին փխրուն է, քանզի դրա մեջ մտնում են տարբեր արժեքներ ունեցող ուժեր:
«Վերջին տվյալներով, Մոսուլի ազատագրման համար կոալիցիոն ուժերը ունեն մոտ 100 հազար զորք ընդդեմ 5-հազարանոց «Իսլամական պետություն» խմբավորման: Հակաահաբեկչական կոալիցիայում ընդգրկված են շիաներից կազմված զորքերը, իրաքյան ուժերը, որոնց մեծամասնությունը սունիներ են, և քրդական բանակը»,- ասաց քաղաքագետը և հավելեց, որ Մոսուլ քաղաքը ամբողջապես կազատագրվի, սակայն դրա համար ժամանակ կպահանջվի:
Իսկադարյանի կարծիքով՝ Մոսուլի ազատագրումից հետո դիվիդենտների բաշխման խնդիր է առաջանալու:
«Մոսուլի ազատագրումից հետո կոալիցիայի կազմի մեջ մտնող ամեն ուժ հավակնելու է իր ավարի մի մասը վերցնելուն: Մոսուլի հիմնական ավարը նավթն է, իսկ այն էական դեր է խաղալու այդ ուժերի հետագա գոյատևման համար»,- ընդգծեց քաղաքագետը:
Ըստ նրա՝ Հայաստանի համար շատ կարևոր է հետևել այնտեղ տեղի ունեցող իրադարձություններին, քանզի Իրաքի հյուսիսում փաստացի կազմավորվում է քրդական պետություն, իսկ քրդերը քաղաքական առումով կապված են Հայաստանի հետ: