2 րոպեի ընթերցում
ԵՐԵՎԱՆ, 10 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի իշխանությունների համար առաջնային խնդիր է սիրիահայերին ֆիզիկական ոչնչացումից փրկելը. Հայաստանում մեծ սիրով ընդունում են բոլոր այն սիրիահայերին, ովքեր, թեկուզ ժամանակավոր, հայրենիքում հաստատվելու ցանկություն են հայտնում: Հոկտեմբերի 10-ին լրագրողների հետ հանդիպմանն այս մասին ասաց ԱԺ ՀՀԿ խմբակցության պատգամավոր Լեռնիկ Ալեքսանյանը: «Այդպիսին է Հայաստանի իշխանությունների քաղաքականությունը: Մեզ համար կարևոր խնդիր է սիրիահայերին ֆիզիկական ոչնչացումից փրկելը: Հայաստանում պատրաստ են ընդունել ցանկացած սիրիահայի, ով հայրենիք վերադառնալու ցանկություն կունենա, որից հետո արդեն կլուծվի նրանց կացության խնդիրը»,- «Արմենպրես»-ի հաղորդմամբ՝ նշեց Ալեքսանյանը:
Հարցին՝ այդ դեպքում ինչո՞ւ շատերը չեն գալիս հայրենիք՝ հաշվի առնելով Հալեպում տիրող իրավիճակը, պատգամավորն ընդգծեց, որ նրանք Սիրիայում ունեցվածք ունեն և հույսով սպասում են, որ պատերազմը շուտով կավարտվի, և իրենք տեր կլինեն իրենց ունեցվածքին: «Նրանք պետք է ցանկություն հայտնեն Հայաստան գալ, որպեսզի մենք էլ ընդառաջենք: Ես երեկ եմ զրուցել Սփյուռքի նախարարության աշխատակազմի ղեկավարի հետ, նա հայտնեց, որ մշտական կապի մեջ են սիրիահայերի հետ և արձագանքում են բոլոր նրանց դիմումներին, ովքեր ցանկանում են, թեկուզ ժամանակավոր, Հայաստան տեղափոխվել»,- ընդգծեց պատգամավորը:
Նա համաձայն չէ այն դիտարկմանը, թե այնտեղ պատերազմական վիճակ է, և սիրիահայերը չեն կարող կապի հաստատել ու հայտնել Հայաստան վերադառնալու ցանկության մասին: Պատգամավորի խոսքով՝ հնարավոր չէ, որ որևէ մեկը հնարավորություն չունենա որևէ կերպ Հայաստանի իշխանություններին տեղեկացնել Հայաստան գալու ցանկության մասին: «Ցանկացած ոք կարող է դա անել Սիրիայում Հայաստանի դեսպանատան միջոցով»,- եզրափակեց պատգամավորը:
Նա հավելեց, որ կառավարությունը լրջորեն զբաղվում է սիրիահայերի խնդիրներով, կան կոնկրետ հանձնարարականներ: