2 րոպեի ընթերցում
ԵՐԵՎԱՆ, 6 ՀՈԿՏԵՄԲԵՐԻ, ԱՐՄԵՆՊՐԵՍ: Ամերիկացի բժիշկները որոշել են մարդու կյանքի միջին առավելագույն տեւողությունը: Ինչպես տեղեկացնում Է «Արմենպրես»-ը, դրան նվիրված հետազոտությունը հրապարակված Է Nature հանդեսում, դրա մասին հակիրճ հաղորդել Է EurekAlert հրատարակությունը:
Մարդու կյանքի առավելագույն միջին տեւողությունը (այսինքն՝ կյանքի առավելագույն տեւողությունը՝ միջինացված ըստ Երկրագնդի բոլոր երկարակյացների) կազմում Է 115 տարի: Գիտնականների եզրակացությունների համաձայն՝ մարդու կյանքի բացարձակ առավելագույն տեւողությունը հավասար Է 125 տարվա: Այն բանի հավանականությունը, որ մարդն այդ ժամկետից ավելի կապրի, կազմում Է 0,0001 տոկոս:
Մասնագետներն այս եզրակացություններին են եկել՝ վերլուծելով 20-րդ դարում եւ 21-րդ դարի սկզբին մարդկանց կյանքի որակի բարելավման տեմպերը եւ կյանքի միջին տեւողության դինամիկան: Գիտնականների կարծիքով՝ մոտավորապես 1990-ական թվականներին մոլորակի վրա կյանքի միջին առավելագույն տեւողությունը դադարել Է աճել, չնայած կյանքի որակի շարունակվող բարելավմանը:
Գիտնականների համոզմամբ, ինֆեկցիոն եւ խրոնիկական հիվանդությունների բուժման եւ կանխարգելման հետագա առաջընթացը կարող Է բարձրացնել կյանքի միջին, բայց ոչ միջին առավելագույն տեւողությունը: Երկրի վրա երբեւիցե ապրած ամենատարեց մարդը, որի ծննդյան եւ մահվան տարեթվերը պաշտոնապես հաստատված են, եղել Է ֆրանսուհի Ժաննա Կալմանը, որը մահացել Է 1997 թվականի օգոստոսին: Նա ապրել Է 122 տարի 5 ամիս եւ 14 օր: