2 րոպեի ընթերցում
ԵՐԵՎԱՆ, 3 ՀՈԿՏԵՄԲԵՐԻ, ԱՐՄԵՆՊՐԵՍ: Վիգեն Սարգսյանին Հայաստանի Հանրապետության պաշտպանության նախարար նշանակելը «Կովկաս» ինստիտուտի փոխտնօրեն քաղաքագետ Սերգեյ Մինասյանը քաղաքականորեն տրամաբանական է համարում: «Արմենպրես»-ի հաղորդմամբ՝ հոկտեմբերի 3-ին լրագրողների հետ հանդիպմանը Մինասյանը կարծիք հայտնեց, որ Վիգեն Սարգսյանն ունի բավական մեծ փորձ և քաջատեղյակ է ոլորտից:
«Իհարկե, նախկին պաշտպանության նախարար Սեյրան Օհանյանը բարձր մակարդակի պաշտոնյա էր, սակայն ապրիլյան իրադարձությունից հետո անհրաժեշտ էր բարձրագույն ղեկավարության` ի դեմ նախագահ Սերժ Սարգսյանի, ավելի ակտիվ ներգրավվածությունը: Այստեղ Վիգեն Սարգսյանի գործոնը, որպես նախկին աշխատակազմի ղեկավար և ոլորտին քաջատեղյակ մարդ, հասկանալի է»,-ասաց Մինասյանը:
Ըստ քաղաքագետի՝ Վիգեն Սարգսյանի առաջ բավականին լուրջ խնդիրներ են կանգնած:
«Կարծում եմ` նոր նախարարի համար առաջնահերթ պետք է լինի նոր ռազմական դոկտրինն ու ընդհանրապես անվտանգության և պաշտպանության ոլորտում կոնցեպտուալ փաստաթղթերի ստեղծման, զսպման ռազմավարության մշակումը»-, նշեց Մինասյանը:
Քաղաքագետի դիտարկմամբ՝ քաղաքացիական անձին Պաշտպանության նախարար նշանակելը պետք է զարմանք չառաջացնի, քանզի Հայաստանի Հանրապետությունն ունի երկարաժամկետ փորձ քաղաքացիական անձին այդ ոլորտում նշանակելու, և դա բավականին արդյունավետ է եղել:
Հայաստանի Հանրապետության Նախագահ Սերժ Սարգսյանը հոկտեմբերի 3-ին ստորագրել է հրամանագիր` Վիգեն Սարգսյանին ՀՀ պաշտպանության նախարար նշանակելու մասին: