2 րոպեի ընթերցում
ԵՐԵՎԱՆ, 3 ՀՈԿՏԵՄԲԵՐԻ, ԱՐՄԵՆՊՐԵՍ: Հալեպում պատերազմական գործողություններն ագրեսիվ փուլ են մտել, ինչի պատճառներից մեկը հրադադարի ձախողումն է: Այս մասին «Արմենպրես»-ի մամուլի սրահում հրավիրված ասուլիսում նշեց արաբագետ, ԵՊՀ քաղաքակրթական և մշակութային հետազոտությունների կենտրոնի գիտաշխատող Հայկ Քոչարյանը:
Նրա խոսքով, կոալիցիոն ուժերի կողմից իրականացվեց ռմբահարում Դեր Զորում գտնվող սիրիական կառավարական ուժերի ուղղությամբ, ինչը սիրիական կառավարական ուժերը գնահատեցին որպես բացահայտ ագրեսիա իրենց նկատմամբ: Ըստ արաբագետի` սա հանգեցրեց նրան, որ կողմերն սկսեցին մեղադրել մեկը մյուսին, ինչն էլ խանգարեց հրադադարի պահպանմանը:
«Հրադադարի հաստատման ուղղությամբ սկսված քաղաքական գործընթացը հույս էր ներշնչում, որ կարող է հաջողություն լինել, բայց այսօր ունենք այն, ինչ ունենք: Սրացումն ակնհայտ երևում է Հալեպի արևելյան շրջաններում, որտեղ կառավարական ուժերը փորձում են վերականգնել վերահսկողությունը»,-ասաց նա:
Արաբագետը նկատեց, որ ստեղծվել է մի իրավիճակ, ըստ որի ԱՄՆ-ն ավելի շատ զբաղված է իր ներքին հարցերով, հետևաբար, առիթից օգտվելով, մյուս ուժերը Սիրիայում փորձում են ամրապնդել իրենց դիրքերը: Այդ տեսանկյունից իրավիճակը բարենպաստ է նախագահ Բաշար ալ-Ասադի համար: Ստեղծված հնարավորություններից փորձում է օգտվել Ռուսաստանը` ձգտելով ամրապնդել իր դիրքերը այդ տարածաշրջանում:
Հայկ Քոչարյանի խոսքով, սա հուշում է, որ առաջիկայում` մինչև տարեվերջ, ականատես ենք լինելու նոր սրացումների: Մարտնչող կողմերը պատրաստվում են հաջորդ բանակցային գործընթացին, որն, ըստ նրա, անխոս պետք է լինի: