1 րոպեի ընթերցում
ԵՐԵՎԱՆ, 18 ՕԳՈՍՏՈՍԻ, ԱՐՄԵՆՊՐԵՍ: Միջազգային օլիմպիական կոմիտեի հեռուստատեսային եւ մարկետինգային ծառայության գործադիր տնօրեն Տիմո Լումմեն հայտարարել է, որ Ռիո դե Ժանեյրոյի Օլիմպիական խաղերը կդիտի նույնքան մարդ, որքան Լոնդոնի խաղերը: Լումմեի խոսքը մեջբերել է Reuters գործակալությունը, տեղեկացնում է «Արմենպրես»-ը:
ՄՕԿ-ի գնահատումների համաձայն՝ մինչեւ Օլիմպիադայի ավարտը մրցումները կդիտի մոլորակի բնակչության մոտավորապես կեսը՝ 3,6 մլրդ մարդ: Նույն քանակությամբ մարդիկ են դիտել 2012 թվականի Խաղերը: Մինչ այժմ առավել շատ հանդիսատեսներ են գրանցվել Հյուսիսային եւ Հարավային Ամերիկայում:
«Հաշվարկը շարունակվում է, սակայն, մեր կանխատեսումներով, Ռիոյի Խաղերի բացման արարողությունը դիտած մարդկանց թիվը կլինի նույնքան, որքան եւ չորս տարի առաջ՝ մոտավորապես 342 մլն»,- ասել է Լումմեն:
Ռիոյի Օլիմպիական խաղերը կավարտվեն օգոստոսի 21-ին, հաղորդել է ՏԱՍՍ-ը: