Հռոմի պապի այցը ապացուցեց աշխարհին, որ արդարությունն ու ճշմարտությունը վեր են քաղաքական շահերից
3 րոպեի ընթերցում
ԵՐԵՎԱՆ, 28 ՀՈՒՆԻՍԻ, ԱՐՄԵՆՊՐԵՍ: Հռոմի պապը, ևս մեկ անգամ արտասանելով «ցեղասպանություն» եզրույթը, հստակ ցույց տվեց ամբողջ աշխարհին, որ արդարությունը, ճշմարտությունը պետք է վեր լինեն բոլոր տեսակի քաղաքական շահերից: Այսպիսի կարծիք հայտնեց Հ. Թումանյանի անվան տիկնիկային թատրոնի գեղարվեստական ղեկավար Ռուբեն Բաբայանը լրագրողների հետ մամուլի ասուլիսի ժամանակ՝ խոսելով Հռոմի սրբազան քահանայապետ Ֆրանցիսկոս պապի Հայաստան այցի մասին:
«Հռոմի պապը ոչ միայն խոսում էր բարության, համեստության, ներողամտության, քաղաքակրթության մասին, այլև իր սեփական օրինակով ցույց էր տալիս, թե ինչպիսին պետք է լինի այդ արժեքների կրողը: Սեփական օրինակից լավ դաս չի կարող լինել: Մենք պետք է հասկանանք, որ արագ փոփոխություններ չեն լինում, բայց երբեք ուշ չէ դրական փոփոխությունների համար: Պապի գլխավոր ուղերձը մեր արժեքներին տեր կանգնելն է: Հռոմի պապը մեր երկրից սեր տարավ, իսկ Հայաստանը լիքն է այդ էներգետիկայով»,- «Արմենպրես»-ի հաղորդմամբ՝ ասաց Բաբայանը:
Կիսելով Ռուբեն Բաբայանի կարծիքը՝ «Անտարես» հրատարակչության տնօրեն Արմեն Մարտիրոսյանը նշեց, որ Պապն իր սեփական օրինակով շատ կարևոր հարցեր բարձրացրեց և ուղերձներ հղեց: «Մենք պետք է չմոռանանք, որ Հռոմի պապը նաև պետության ղեկավար է, և որպես պետության ղեկավար նրա այցը որոշակի առաքելություն ունի: Ես կարծում եմ, որ նրա այցը կարող է որոշ աշխարհաքաղաքական լուծումներ տալ»,-ասաց Մարտիրոսյանը:
ՀԳՄ նախագահ Էդվարդ Միլիտոնյանը նշեց, որ Պապի այցելության ընթացքում աշխարհի լրատվամիջոցների ուշադրությունը Հայաստանի վրա էր սևեռված, և դա ևս մեկ հնարավորություն էր աշխահին մեր մշակույթին և պատմությանը ծանոթացնելու համար:
«Մենք քրիստոնեությունը պետական կրոն ընդունած առաջին ժողովուրդն ենք, և սա հաշվի առնելով՝ Հռոմի նապը իր այցը կոչեց ուխտագնացություն: Ես կարծում եմ, որ նրա կողմից «ուխտագնացություն» բառի օգտագործումը շատ կարևոր էր, սա դառնալու է ավանդույթ, և մարդիկ ուխտագնացության են գալու հնագույն պատմությամբ, հարուստ մշակույթով երկիր: Հռոմի պապն ապացուցեց, որ ծանոթ է Հայաստանի մշակույթին, հայ մարդուն»,-ասաց Միլիտոնյանը:
Միլիտոնյանը նաև հավելեց, որ Հռոմի պապի ուղերձներն ուղղված են համայն մարդկությանը: Հռոմի պապը աշխարհում խաղաղության, արդարության կրողն է, և դրա վկայությունը հայ-թուրքական սահմանին նրա արձակած աղավնիներն էին: