2 րոպեի ընթերցում
ԵՐԵՎԱՆ, 17 ՄԱՅԻՍԻ, ԱՐՄԵՆՊՐԵՍ: Կենսական անհրաժեշտություն է պետական միջոցները խնայողաբար ծախսելը: Այս մասին հայտարարել է ՀՀ նախագահ Սերժ Սարգսյանը Վիեննայից Երևան վերադառնալու ճանապարհին օդանավում այցը լուսաբանող լրագրողներին հետ զրույցում ամփոփելով ԵԱՀԿ Մինսկի խմբի համանախագահող երկրների նախաձեռնությամբ Ադրբեջանի նախագահ Իլհամ Ալիևի հետ կայացած հանդիպումը:
«Ո՞վ է ասում, որ նախկինում մենք այդ ցանկությունը չենք ունեցել: Իհարկե, պետք է դա անել: Մեզնից յուրաքանչյուրը, լինի գործադիր, թե օրենսդիր, թե դատական օղակ, պետք է հասկանա, որ ամեն օր պետք է մտածել բարելավումների մասին: Մեկ անգամ չէ, որ դրա մասին խոսել ենք: Պարտադիր չէ, որ այդ չորսօրյա պատերազմը լիներ ու նոր խոսենիք բարեփոխումների մասին: Փետրվարի 12-ին ես ելույթ եմ ունեցել, վստահ եք, որ չէի կարող ապրիլի սկզբի իրադարձությունները կանխատեսել, խոսել եմ փոփոխությունների մասին: Երբ մենք նախաձեռնում էինք սահմանադրական բարեփոխումները, դա նշանակում է փոփոխությունների սկիզբ: Փետրվարը հաջորդ փուլն էր, անկախ նրանից ռազմական գործողություններ են եղել, թե ոչ, այդ փոփոխությունները պետք է ընթանան»,-«Արմենպրես»-ի հաղորդմամբ` ասել է Սերժ Սարգսյանը:
Նախագահի խոսքով, շատերը բավարարած չեն այդ փոփոխությունների տեմպերով, բայց մյուս կողմից պետք է հասկանալ, որ կտրուկ փոփոխությունները որևէ լավ հանգրվանի չեն հասցնի:
«Տեսնում եք փոփոխություններ տնտեսության, վերաբերմունքի մեջ, մյուս կողմից ռազմական գործողություններ են, արդյո՞ք դրանք համատեղելի են: Միշտ էլ կարելի է իշխանութուններին կշտամբանք ուղղել նրանց դանդաղկոտության կամ ենթադրյալ դանդաղկոտության համար: Բայց դրա լավագույն չափորոշիչը խնդրին համեմատության մեջ նայելն է: Ճիշտ ճանապարհը դա է»,-հավելել է նախագահը: