2 րոպեի ընթերցում
ԵՐԵՎԱՆ, 1 ԱՊՐԻԼԻ, ԱՐՄԵՆՊՐԵՍ: Ղարաբաղյան հարցի վերաբերյալ անցկացվող հանդիպումներից առանձնապես դրական սպասումներ պետք չէ ունենալ: «Արմենպրես»-ի մամուլի սրահում հրավիրված ասուլիսին նման կարծիք հայտնեց ՀՀ ԳԱԱ Արևելագիտության ինստիտուտի տնօրեն Ռուբեն Սաֆրաստյանը:
«Ես չեմ կարծում, որ Ադրբեջանը պատրաստ է հրաժարվել վերջին շրջանում ցուցաբերած ագրեսիվ պահվածքից, դրա նախադրյալները չկան: Նրա այդ ագրեսիվ պահվածը ռազմավարական նշանակություն ունի: Ալիևը նպատակ է դրել փոխել ստատուս քվոյի իրադրությունը, որը գոյություն ունի ԼՂ կարգավորման հարցում»,-ասաց Ռուբեն Սաֆրաստյանը:
Դրանից բացի, կա ևս մեկ գործոն: Ռուբեն Սաֆրաստյանի խոսքով, ռուս-թուրքական հարաբերությունների սրացումը նաև որոշակի ազդեցություն կարող է ունենալ Ադրբեջանի պահվածքի վրա:
«Ադրբեջանը կձգտի, հաշվի առնելով ավագ գործընկերոջ, մեծ եղբոր խորհուրդները, հորդորները, էլ ավելի սրել իրադրությունը Հարվային Կովկասում, այդպիսով իսկ նպաստելով թուրքական ծրագրերի իրականացմանը: Այսինքն` Թուրքիան, ռուս-թուրքական հարաբերությունների սրացման պարագայում, կշարունակի որպես գործիք օգտագործել Ադրբեջանը»,-ասաց Ռուբեն Սաֆրաստյանն` ընդգծելով, որ ղարաբաղյան խնդրի կարգավորման հարցում ներկայում դրական փոփոխություններ սպասելն իմաստ չունի: