2 րոպեի ընթերցում
ԵՐԵՎԱՆ, 11 ԴԵԿՏԵՄԲԵՐԻ, ԱՐՄԵՆՊՐԵՍ: «Ժառանգություն» խմբակցության քարտուղար Թեւան Պողոսյանը վստահ է, որ մոտակա ժամանակահատվածում հայ ադրբեջանական սահմանին լարվածությունը կմնա բարձր մակարդակի վրա եւ կշարունակվի այնքան ժամանակ, մինչեւ երկու երկրների նախագահները հանդիպեն: Պատգամավորը չի բացառում, որ Սերժ Սարգսյանի եւ Իլհամ Ալիեւի հանդիպման օրը լարվածությունը կհասնի բարձրակետին: «Արմենպրես»-ի փոխանցմամբ՝ նման տեսակետը պայմանավորված է նախկին փորձով, երբ երկու երկրների նախագահների կամ ԱԳ նախարարների հանդիպման ժամանակ Ադրբեջանը միշտ մի քանի անգամ մեծացրել է լարվածությունը սահմանին:
«Մինչեւ նախագահների հանդիպումը՝ սրացում է լինելու, չեմ զարմանա, որ հանդիպմանն օրն էլ սրացում լինի, չի բացառվում սրացում նաեւ հանդիպումից հետո, երբ պարզ կլինի քննարկված հարցերի շրջանակը: Այնպես որ, մինչեւ Նոր տարի իրավիճակը սահմանին լարված կլինի, նույնը կշարունակվի նաեւ տոնական օրերին»,- ասաց պատգամավորը: Թեւան Պողոսյանը շեշտում է, որ սահմանին լարվածությունը պայմանավորված է Ադրբեջանի ներքին եւ արտաքին խնդիրներով: Դրան գումարվում է նաեւ տարածաշրջանում առկա մարտահրավերները:
«Ադրբեջանն ունի տնտեսական լուրջ խնդիրներ, իսկ Ալիեւն ու նրա պաշտպանության նախարարն էլ խոստումները պահելու խնդիր ունեն: Դրան գումարենք երկրում կայացած ընտրություններն ու նաեւ համաշխարհային այս բարդ իրավիճակում Թուրքիային սատարելու ցանկությունը»,- ասաց Թեւան Պողոսյանը:
Վերջին շաբաթների ընթացքում խիստ լարված է իրավիճակը հայ-ադրբեջանական սահմանին: Ադրբեջանի զինված ուժերը կիրառում են նաեւ ծանր տեխնիկա, իսկ երկու օր առաջ ադրբեջանական տանկի կրակոցից հայ զինվոր է մահացել: ՊԲ արևելյան ուղղությամբ տեղակայված զորամասերից մեկի պահպանության տեղամասում էլ դեկտեմբերի 11-ին` ժամը 08:50-ի սահմաններում, հակառակորդի կողմից հրադադարի ռեժիմի խախտման արդյունքում մահացու հրազենային վիրավորում է ստացել ՊԲ պայմանագրային զինծառայող, 1994թ. ծնված Վարդան Արթուրի Վարդանյանը: