388.33
Գերմանիան դիմել է Թուրքիային Ինջիրլիքի ռազմաբազան օգտագործելու հարցով
1 րոպեի ընթերցում
ԵՐԵՎԱՆ, 2 ԴԵԿՏԵՄԲԵՐԻ, ԱՐՄԵՆՊՐԵՍ: Գերմանիայի կառավարությունը դիմել է Թուրքիային՝ Ինջիրլիքի ռազմաբազան Սիրիայում գործող ահաբեկչական կազմակերպությունների դեմ օգտագործելու խնդրով: Ինչպես հաղորդում է «Արմենպրես»-ը, այս մասին տեղեկացնում է թուրքական «Հուրիեթ» պարբերականը:
Գերմանիայի կառավարությունը դեկտեմբերի 1-ին հավանության է արժանացրել Սիրիայում հակաահաբեկչական գործողություններ իրականացնելու մասին որոշումը: Իսլամիստ ծայրահեղականների դեմ պայքարին կներգրավվեն 1200 զինվոր, 4-6 Tornado ռմբակոծիչներ և հետախուզանավ:
Սիրիայում գործողություններ սկսելուց առաջ անհրաժեշտ է, որ գերմանական կառավարության այս որոշումը հաստատվի Բունդեսթագում: Դրական պատասխանի պարագայում սա Մերձավոր Արևելքում կլինի Գերմանիայի առաջին ռազմական միջամտությունը:
Գերմանիայի իշխանությունները համապատասխան նամակ են ուղարկել պաշտոնական Ակարային՝ հայտնելով, որ ցանկանում են ռմբակոծիչները տեղակայել Ինջիրլիքում: Նշվում է, որ Թուրքիայի զինված ուժերի գլխավոր շտաբը և արտաքին գործերի նախարարությունը դրական պատասխան են տվել գերմանական կողմի դիմումին:
