«Դետք». երեք երաժշտից բաղկացած արդեն սիրված «զինվորական» խումբ

ԵՐԵՎԱՆ, 3 ՆՈՅԵՄԲԵՐԻ, ԱՐՄԵՆՊՐԵՍ:Նրանք առաջին անգամ հանդիպեցին երևանյան ակումբներից մեկում: Երեք աթոռ, իսկ սեղանին` A4 ֆորմատի երեք թերթիկ. Արմանը, Արեգը և Ներսեսը, վերցնելով դրանք, նկատեցին, որ թղթերին իրենց ամենասիրելի` Coldplay խմբի «Paradise» երգն է: Հենց այսպես են հայկական «Դետք» խմբի անդամները հիշում իրենց առաջին հանդիպումը, ծանոթությունն իրենց պրոդյուսեր Արման ԱՄՊ-ի հետ, ում նախաձեռնությամբ էլ ստեղծվեց ակտիվ գործունեություն ծավալող երիտասարդական խումբը:

«Արմենպրեսե-ը ներկայացնում է «Դետքե-ի տղաներին` Ներսես Ավետիսյանին, Արեգ Շահինյանին և Արման Պետրոսյանին ու խմբի ստեղծման պատմությունը:

«Դետք»-ի տղաները` իրենց նախասիրությունների ու երաժշտական ասպարեզում հայտնվելու մասին

Ներսես Ավետիսյան, 18 տարեկան-Սովորում եմ Երևանի թատրոնի և կինոյի պետական ինստիտուտի երկրորդ կուրսում` Սուրեն Բաբայանի արվեստանոցում: Սովորել եմ Գառնիի երաժշտական դպրոցի դասական վոկալ բաժնում, աշխատել եմ Երգի պետական թատրոնում որպես երգիչ-դերասան: Կինոյի նկատմամբ հետաքրքրություն առաջացավ 4-5 տարի առաջ. դերասան Կարեն Ջանիբեկյանը Գառնիում տուն ուներ, պապիկիս հետ մտերիմ էր, և նրա շնորհիվ սկսեցի հետաքրքրվել հայկական ֆիլմերով, սեր առաջացավ ֆիլմերի և բեմի հանդեպ:

Արեգ Շահինյան, 18 տարեկան- Սովորում եմ Հայ-ռուսական (Սլավոնական) համալսարանում` Ժուռնալիստիկայի ֆակուլտետի առաջին կուրսում, մեկ տարի է` ինչ ինձ գտել եմ երաժշտության մեջ: Մինչ այդ լսում էի երաժշտություն, բայց իմ մեջ խիզախություն չէի գտնում մտնել երաժշտական ոլորտ: Շատ հետաքրքրված էի մարքեթինգով, ծրագրավորմամբ, տարբեր գրքեր էի կարդում, հիմա ինձ գտել եմ երաժշտության մեջ:

Ժուռնալիստիկան այն բնագավառն է, որ մինչ այդ չէի ուսումնասիրել և ինձ հետաքրքրում էր, դրա համար ընդունվեցի այդ ֆակուլտետ: Չեմ կարծում, որ կցանկանամ աշխատել որպես լրագրող:

Արման Պետրոսյան, 17 տարեկան-Սովորում եմ թիվ 29 ավագ դպրոցում, հաճախում եմ Սպենդիարյանի անվան երաժշտական դպրոց` կիթառի բաժին: Իմ երազանքն էր լինել երաժիշտ, վաղ հասակից էի նման նպատակ դրել: Կոնսերվատորիա եմ ընդունվելու, հետո բանակ կգնամ:

«Դետք»-ը` ռազմական եզրույթ

«Դետք»-ը ռազմական եզրույթ է՝ երեք զինվորից բաղկացած խումբ, որի խնդիրն իրեն վստահված տարածքին հետևելն է: Խումբը ստեղծվել է 2015 թվականին՝ պրոդյուսեր Արման ԱՄՊ-ի կողմից։ Դեբյուտը կատարել է «Մամա» երգով։ Առաջին տեսահոլովակի՝ «Forevermore»-ի («Հավերժից էլ երկար») շնորհանդեսը տեղի է ունեցել ապրիլի 20-ին Գաֆեսճյան արվեստի կենտրոնում։ Այն նվիրված է Հայոց ցեղասպանության 100-րդ տարելիցին:

Ներսես - 2014 թվականի ավարտին Արման ԱՄՊ-ն մեզ համախմբեց մեկ խմբում: Նրա աչքի տակով շատ երիտասարդներ են անցել, սակայն հենց մեր բախտը բերեց և մենք դարձանք «Դետք»-ի «զինվորները»: Մինչ այդ առանձնապես չենք շփվել, չենք ճանաչել իրար: «Դետք»-ը պարտադիր պետք է կազմված լինի երեք զինվորից: Այն պետք է հսկի իրեն վստահված տարածքը: Մեր տարածքը կարծես թե Անդրկովկասյան Հայաստանն է, չգիտենք, թե երբ ենք ճեղքելու, Անդրկովկասից անցնելու դեպի մեծ աշխարհ:

Առաջին հանդիպում, առաջին քայլեր

Ներսես - Առաջին անգամ հանդիպեցինք երևանյան ակումբներից մեկում, և առանց իրար ճանաչելու, ընդամենը ծանոթանալուց հետո սկսեցինք երգել Coldplay խմբի «Paradise»-ը: Շատ հետաքրքիր պրոդյուսերական քայլ էր Արման ԱՄՊ-ի կողմից:

Արեգ-Կարծես թե ստացվեց:

Արման –Մենք մոտավորապես չորս ամիս ոչինչ չարեցինք, ծանոթանում էինք իրար հետ: Պետք է դառնայինք մեկ կորիզ, մեկ ընտանիք:

Ներսես- Բնականաբար ավելի հեշտ է, երբ մարդուն գիտես, քանի որ իրար հետ բեմ եք բարձրանում: Չորս ամիս շփվել ենք, ընկերացել, մի բռունցք ենք դարձել, հետո Գաֆեսճյան արվեստի կենտրոնում տեղի ունեցավ մեր առաջին տեսահոլովակի` «Forevermore»-ի պրեմիերան:

Արեգ- Դրան հաջորդեցին այլ ստեղծագործություններ` «Շուշին» և «Մայրիկը»: «Մայրիկը» կարծես տեսաբացիկ լինի, նվիրված է մեր մայրերին, այն մասին է, թե ինչպես ենք սիրում նրանց: Մինչև «Շուշի» երգի տեսահոլովակը նկարահանելն այցելեցինք Ստեփանակերտ, Շուշի. մեզ շատ դուր եկավ:

Ներսես- Բուռն գործունեությունից հետո տեղի ունեցավ «Շուշի» տեսահոլովակի պրեմիերան. այն ընդունվեց լսարանի կողմից: Այդ տեսահոլովակը հրապարակեց նաև World music awards-ը. շատ հաճելի էր ու պարտավորեցնող: Սեպտեմբերի 2-ին Արցախի անկախության օրը երգել ենք Ստեփանակերտում, մեզ հիանալի ընդունեցին, իսկ հոկտեմբերի 9-ին Էրեբունի-Երևանի տոնակատարության ժամանակ ներկայացրինք «Թռանք Երևան» երգը, որի տեսահոլովակը հավանաբար հանդիսատեսին կներկայացնենք նոյեմբերին:

Ելույթ Ոսկեպարում

Ներսես- Նոյեմբերի 5-ին մենք կայցելենք մեր սահմանամերձ գյուղերից մեկը` Ոսկեպար, կերգենք «Դետք»-ի բոլոր երգերը, ինչպես նաև խաղալիքներ, գրենական պիտույքներ կտանենք, որ երեխաներին ուրախացնենք:

«Դետք»- Երիտասարդությունը մեզ շատ լավ է ընդունում, բայց մեդիա դաշտում կան խնդիրներ. տեսահոլովակների հեռարձակման համար գումարներ են պահանջում: Բայց մենք չենք նեղվում, աշխատում ենք ավելի համարձակ, որպեսզի կոտրենք կարծրատիպերը:

Հարցազրույցը`Ռոզա Գրիգորյանի

Լուսանկարները` Ֆելիքս Առուստամյանի

«Դետք»-ի «Շուշի» տեսահոլովակը