2 րոպեի ընթերցում
ԵՐԵՎԱՆ, 27 ՀՈԿՏԵՄԲԵՐԻ, ԱՐՄԵՆՊՐԵՍ:Ադրբեջանը կարճ ու այժմեական խնդիր լուծելու համար պատրաստ է վտանգի տակ դնել ավելի կարևոր ու երկարաժամկետ նշանակության հարցեր: «Արմենպրես»-ի հետ զրույցում նման տեսակետ հայտնեց քաղաքագետ Հրանտ Մելիք-Շահնազարյանը` շեշտելով, որ դժվար է տրամաբանություն փնտրել ադրբեջանցիների գործողություններում:
Նրա խոսքով` Ադրբեջանը, գնդակոծություն իրականացնելով ղարաբաղաադրբեջանական շփման գծի երկայնքով, սադրում է և փորձում այնպիսի իրավիճակ ստեղծել, որ տպավորություն ստեղծվի, թե իրավիճակը լարված է ու դրանում մեղավորությունն ընկնի Արցախի պաշտպանության բանակի վրա: «Սակայն Ադրբեջանի հաշվարկներն իրենց չարդարացրեցին, ու փաստացի կրակի տակ հայտնվեցին այլ դիտորդներ»,-ասաց քաղաքագետը:
Հրանտ Մելիք-Շահնազարյանն Ադրբեջանի սադրիչ գործողությունների դադարեցման հանձնառություն չի տեսնում, քանի որ հակառակորդն այդպիսի ցանկություն չի հայտնում: «Պետք չէ սպասել դրական զարգացում: Պարզ է, որ առկա է հակամարտություն ու ադրբեջանցիներն իրենց թշամանությունն են անում: Մենք պետք է պատրաստ լինենք հակազդեցության»,-եզրափակեց քաղաքագետը:
ԼՂՀ արտգործնախարարության տեղեկատվական վարչությունից տեղեկացրել են, որ հոկտեմբերի 27-ին Լեռնային Ղարաբաղի և Ադրբեջանի զինված ուժերի շփման գծի դիտարկման ժամանակ ԵԱՀԿ Մինսկի խմբի համանախագահները և ԵԱՀԿ գործող նախագահի անձնական ներկայացուցիչն անցել են ադրբեջանական տարածք՝ ԼՂՀ կողմից: Սակայն դիտարկման ավարտի պահին գրանցվել է գնդակոծություն ավտոմատ հրազենից ադրբեջանական կողմից:
Դիտարկումն անց է կացվել Մարտակերտ-Թարթառ ճանապարհահատվածում՝ ԵԱՀԿ գործողնախագահի անձնական ներկայացուցիչ դեսպան Անջեյ Կասպշիկի գլխավորությամբ և ԵԱՀԿՄինսկի խմբի համանախագահների մասնակցությամբ: