1 րոպեի ընթերցում
ԷՋՄԻԱԾԻՆ, 8 ՀՈԿՏԵՄԲԵՐԻ ԱՐՄԵՆՊՐԵՍ: Էջմիածին քաղաքի Ե. Թադևոսյանի անվան գեղարվեստի դպրոցը այսուհետև կներկայանա նոր տեսքով, նորոգված ու կահավորված սենյակներով: Սա քաղաքապետարանի նվերն է քաղաքացիներին: Էջմիածնի 2700-ամյակի կապակցությամբ շենքում կատարվել է շինարարություն, փոխվել գույքը, կատարվել վերանորոգում:
«Արմենպրես»-ի հետ զրույցում դպրոցի ուսումասվար Կարինե Գարաքյանն ասաց, որ ներկայումս հաճախում են 215 աշակերտ, սակայն չ բացառվում, որ վերանորոգումից հետո դպրոցն ընդունի մինչև 300 երեխայի։
«Դպրոցում 11 ուսուցիչ է աշխատում: Նրանք դասավանդում են գեղանկարչություն, դեկորատիվ կիրառական արվեստ, քանդակագործություն, արվեստի պատմության առարկաներ։ Այս տարիների ընթացքում դպրոցը բազմաթիվ ձեռքբերումներ է ունեցել: Մեր աշակերտները մասնակցում են մրցույթների, գրավում բարձր հորիզոնականներ»,- ասաց Գարաքյանը, որ դպրոցի բազմաթիվ շրջանավարտներ Հայաստանում եւ արտերկրում ունեցել են բազմաթիվ ցուցահանդեսներ: Գարաքյանը հիշում է, որ երբ դպրոցը նոր էր բացվել, ուներ ընդամենը 25 աշակերտ: Տարիների ընթացքում աշակերտների թիվը տասնապատկվեց եւ այժմ դպրոցի գործունեությանը թերահավատորեն չեն վերաբերվում:
