Խորհրդարանը սահմանադրական բարեփոխումների նախագիծը հանրաքվեի դնելու մասին որոշում ընդունեց

ԵՐԵՎԱՆ, 5 ՀՈԿՏԵՄԲԵՐԻ, ԱՐՄԵՆՊՐԵՍ: Ազգային ժողովը քվեարկությամբ ընդունեց սահմանադրական բարեփոխումների նախագիծը հանրաքվեի դնելու մասին Ազգային ժողովի որոշումը: Ինչպես հաղորդում է «Արմենպրես»-ը, սահմանադրական բարեփոխումների նախագիծը հանրաքվեի դնելու որոշմանը կողմ քվեարկեց 104, դեմ՝ 10, ձեռնպահ՝ 3 պատգամավոր:

Մինչ այդ Սահմանադրական բարեփոխումների մասնագիտական հանձնաժողովի անդամ, ՀՀ նախագահի ներկայացուցիչ Վարդան Պողոսյանն իր ելույթում ներկայացրել էր բոլոր այն փոփոխությունները, որոնք կատարվել են պատգամավորների առաջարկների հիման վրա: Նա նշեց, որ պատգամավորների առաջարկների հիման վրա կատարված բոլոր փոփոխություններն արժանացել են ՀՀ նախագահի հավանությանը և հենց այդ տեսքով էլ նախագիծը ներկայացվել է Ազգային ժողովի քվեարկությանը: