Կարկուտից եւ փոթորիկից վնասներ են կրել Արարատի մարզի ութ համայնքներ

ԱՐՏԱՇԱՏ, 28 ՕԳՈՍՏՈՍԻ, ԱՐՄԵՆՊՐԵՍ: Օգոստոսի-ի 22-ի երեկոյան Արարատի մարզում տեղացած կարկուտն ու փոթորիկը զգալի վնասներ են հասցրել մարզի Շահումյան, ք. Արտաշատ, Վերին Արտաշատ, Այգեզարդ, Այգեպատ, Ոստան, Մրգավան, Դաշտաքար համայնքների գյուղացիական տնտեսություններին: «Արմենպրես»-ի թղթակցի հետ զրույցում մարզպետարանի աշխատակազմի գյուղատնտեսության եւ բնապահպանության վարչության պետ Հայկազ Տերտերյանը նշեց, որ համայնքներից ստացված ամփոփ տվյալներով` վնասվել է 388 հա խաղողի եւ 39,25 հա պտղատու այգիներ, ինչպես նաեւ 80 հա բանջարանոցային կուլտուրաներ ու թութունի արտեր: «Տարբեր համայքներում վնասները եղել են տարբեր չափերի: Ելներով ավագանիներից բաղկացած հանձնաժողովների փաստագրումներից եւ գույքագրումներից` առանձին հատվածներում վնասները հասնում են 20-80 տոկոսի: Ամենից շատը տուժել է Շահումյան համայնքը»,- ասաց վարչության պետը: Բնական աղետի հաջորդ օրը հիշյալ համայքներում են եղել վարչության պետն ու մարզպետի տեղակալ Աշոտ Վարդանյանը, իսկ օգոստոսի 27-ին մարզ է այցելել նաեւ ՀՀ գյուղատնտեսության փոխնախարար Սամվել Գալստյանը:

Այն հարցին, թե արդյոք հակակարկտային կայանները չեն կարողացել նպաստել կարկտաբեր ամպերի ցրմանը, Տերտերյանը պարզաբանեց. «Որոշակիորեն նպաստել են աղետի մեղմացմանը: Եթե դրանք էլ չլինեին` վնասի չափերը կհասնեին առավելագույնի»: Նա նաեւ նկատեց, որ Արարատի մարզում հակակարկտային կայանները տեղադրված են սահմանամերձ համայնքների երկայնքով, իսկ այն համայնքներում, որտեղ տեղի ունեցավ կարկտահարություն ու փոթորիկը, գրեթե չկան կայաններ, ինչն էլ հանգեցրեց նման կորստի:

Տեղացած կարկուտն ու ուժեղ քամին ավերածություններ են պատճառել նաեւ այգեգործ Սուքիաս Բադալյանի Շահումյան գյուղի տարածքում գտնվող 6 հազար մետր խաղողի այգուն` իր գնահատմամբ հարյուր տոկոսով ոչնչացնելով բերքը, եւ մասնակի խաղողի վազերը, խաղողասյուները: «Այս տարի մենք սպասում էինք աննախադեպ` 15 տոննայից ավելի բերք, որը մթերելով կունենայինք 2 մլն դրամ գումար: Ողջ տարվա ընթացքում գարնան նախապատրաստական աշխատանքներից մինչեւ հասուն խաղող ստանալը ծախսել էի 700 հազար դրամ: Ունեի նաեւ 1 մլն 300 հազար դրամի վարկ, որն այս տարի նախատեսում էի մարել: Հիմա թեւաթափ եմ եղել, այլեւս ոչինչ անելու ցանկություն չկա»,-ասաց Բադալյանը` ավելացնելով, որ մի քանի ժամում կատարվածը ոչ միայն վնաս հասցրեց այս տարվա ամբողջ բերքին, այլեւ տվեց տարիների վնաս: «Տարիներ են անհրաժեշտ, որպեսզի կոտրված խաղողի վազերը նորից նման բերք տան, ես նույնիսկ չգիտեմ` հաջորդ տարի կստանա՞մ արդյոք խաղողի գոնե մեկ ճութ բերք: Ամբողջությամբ ավերվել է 10 տարեկան այգիս: Ճիշտ ժամանակն էր տարիների չարչարանքս հետ բերելու»,-ընդգծեց նա:

Այգեգործը պայմանագիր ունի Պռոշյանի կոնյակի գործարանի հետ, օրեր առաջ պայմանավորվածություն էր ձեռք բերել նաեւ խաղողը հավաքող բանվորների հետ` սեպտեմբերի 20-ին եւ 21-ին այն հավաքելու եւ մթերման տանելու համար: Նրա խոսքով` մի քանի օր հետո պետք է կատարվեր սրսկում: «Այլեւս ծախս անելու եւ սրսկումներ կատարելու իմաստ չեմ տեսնում` գոնե հաջորդ տարվանից այգին վերականգնելու գործընթացը սկսելու նպատակով: Այժմ տեղի կունենա այս տարվա բերքի նեխում, ինչն ավելի վտանգավոր է»,-նշեց նա:

Փոթորիկը վնասներ է պատճառել նաեւ լոլիկի, վարունգի, եւ այլ բանջարանոցային կուլտրուրաների դաշտերին, ծիրանենիները եւ այլ ծառերը կիսել մեջտեղից, շուռ տվել բարձր լարման էլեկտրասյուներ, պոկել հաղորդալարեր, շրջել տանիքներ` շպրտելով ավտոճանապերհներին:

Արարատի մարզային փրկարարական վարչության տվյալներով, օգոստոսի 22-ին` ժամը19:30-ից մինչեւ 20:15-ն ընկած ժամանակահատվածում մարզի Ռանչպար, Նորամարգ, Ազատավան, Բուրաստան, ք. Մասիս, Տափերական, ք. Վեդի եւ Բաղրամյան համայնքների տարածքում տեղակայված 19 հակակարկտային կայաններով ներգործության է ենթարկվել կարկտավտանգավոր մեկ ամպ, եւ կատարվել է 1396 կրակոց:

Լիլիթ Մաճկալյան