Առողջապահության նախարարի հանձնարարակններով լուծվել է ընդունելության եկած քաղաքացիների հարցերի մեծ մասը
1 րոպեի ընթերցում
ԵՐԵՎԱՆ, 18 ՕԳՈՍՏՈՍԻ, ԱՐՄԵՆՊՐԵՍ: Առողջապահության նախարարության աշխատակազմի ներկայացուցիչներից կազմված հանձնաժողովի անդամների մասնակցությամբ ՀՀ առողջապահության նախարար Արմեն Մուրադյանն անցկացրել է քաղաքացիների հերթական ընդունելությունը:
Ինչպես «Արմենպրես»-ին տեղեկացրին ՀՀ առողջապահության նախարարության հասարակայնության հետ կապերի բաժնից, քաղաքացիների բարձրացված հարցերն առավելապես բուժական բնույթի էին, մեկն էլ` ծառայողական: Ընդունելությանը մասնակցել է 13 քաղաքացի: Մանրամասն ծանոթանալով նրանց հուզող խնդիրներին և լսելով պատասխանատու ստորաբաժանումների ղեկավարների դիտարկումներն ու առաջարկությունները` Արմեն Մուրադյանը բարձրացված հարցերի լուծման համար տվել է հանձնարարականներ: Հարցերի մեծ մասը դրական լուծում է ստացել: Քաղաքացիները շնորհակալություն են հայտնել սրտացավ վերաբերմունքի և իրենց խնդիրների լուծման համար:
ՀՀ առողջապահության նախարարությունում քաղաքացիների ընդունելությունը, համաձայն գործող կարգի, կազմակերպվում է յուրաքանչյուր երեքշաբթի: