Կալիֆոռնիայում մոլեգնող հրդեհներից կարող են տուժել հազարավոր մարդիկ

ԵՐԵՎԱՆ, 4 ՕԳՈՍՏՈՍԻ, ԱՐՄԵՆՊՐԵՍ: Կալիֆոռնիայի իշխանությունները նահանգի տարածքում մոլեգնող անտառային հրդեհների պատճառով տեղի հազարավոր բնակիչների հանձնարարել են լքել իրենց տները:

Ինչպես տեղեկացնում Է «Արմենպրես»-ը՝ հղում անելով BBC-ին, նման հանձնարարականի անմիջական պատճառ Է դարձել Սան Ֆրանցիսկոյից հյուսիս ընկած շրջանում անտառային խոշորագույն հրդեհներից մեկի անսպասելիորեն արագ տարածումը:

Նահանգի իշխանությունները ենթադրում են, որ ընդամենը հրդեհից եւ դրա հետեւանքներից կարող Է տուժել մինչեւ 13 հազար մարդ: Նրանց մի մասն արդեն հարկադրաբար տարհանված Է, մնացածներին հանձնարարել են կամավոր լքել տները:

Այս տարվա ամառը Կալիֆոռնիայում ամենաչորայինն Է վերջին տարիների ընթացքում: Այդ ֆոնին նահանգում լայնածավալ անտառային հրդեհներ են սկսվել: Բռնկման օջախները մարելու համար գործի են դրվել հազարավոր հրշեջներ: