3 րոպեի ընթերցում
ԵՐԵՎԱՆ, 30 ՀՈՒԼԻՍԻ, ԱՐՄԵՆՊՐԵՍ: ԵՊՀ դասախոս, աստվածաբան Վարդան Խաչատրյանն «Իսլամական պետություն»-ից եկող ամենամեծ վտանգը համարում է իսլամական խալիֆայություն ստեղծելու գաղափարախոսության հաստատումը` քաղաքական ճշգրիտ նպատակով և ընթացքով: Վարդան Խաչատրյանի դիտարկմամբ` իսլամը` որպես համաշխարհային կրոն, ի տարբերություն քրիստոնեության, ձևավորվել է սեփական խալիֆայություն ստեղծելով և մասամբ նաև սրի զորությամբ: Այդ կրոնի հիմքում իսլամի` որպես համաշխարհային, եզակի կրոն դարձնելու ձգտումն ու հազարամյակների ընթացքն է: Սակայն այդ ցանկությունը ճզմվել է արդյունաբերական Արևմուտքի ազդեցության ներքո: Այս մասին Վարդան Խաչատրյանը խոսեց հուլիսի 30-ին կայացած ասուլիսի ժամանակ:
Նա նաև նշեց, որ «Իսլամական պետություն» խմբավորման առաջընթացի համար պարարտ հող է քրիստոնեական համակարգի երկրորդայնացումը, քրիստոնեական Արևմուտքի անտարբեր դառնալը քրիստոնյաների բոլոր տեսակի շահերի հանդեպ: «Իզուր չէր, որ Հռոմի պապը Հայոց ցեղասպանության 100-րդ տարելիցին անդրադարձավ այս հարցին` նշելով, որ հայերը շատ մեծ են իր աչքում ու գնահատելի, քանի որ նրանք կարողացել են ի լուր աշխարհի բարձրացնել Թուրիքիայում իրենց ողբերգությունը: Նա ասում էր՝ շատ ճիշտ կլինի, որ Հայաստանում լինի մի հրապարակ, որը կբարձացնի այսօր էլ ցեղասպանության ենթարկվող ազգերի շահերի հարցը»,- -«Արմենպրես»-ի փոխանցմամբ` ասաց Վարդան Խաչատրյանը:
Անդրադառնալով «Իսլամական պետության» դեմ պայքարելու ուղիներին` Վարդան Խաչատրյանը նկատեց, որ միջազգային հանրությունը պետք է համալիր միջոցառումներ ձեռնարկի` նրանց դեմ պայքարելով ոչ միայն զենքով, այլև տնտեսական հնարավորություններից զրկելով, ինչպես նաև հակաքարոզչություն իրականացնելով:
Աստվածաբանի դիտարկմամբ` Թուրքիան հայտարարել է Սիրիայի հյուսիսում ԻՊ-ի դեմ պայքարելու մասին, միևնույն ժամանակ գաղտնիք չէ, որ Թուրքիան ուղղակի հարաբերությունների մեջ է «Իսլամական պետություն» ահաբեկչական խմբավորման հետ: «Թուրքիան ԻՊ-ից գնում է նավթ և արդյունաբերական աջակցություն է ցուցաբերում այդ ռամզաճակատներին»,-նշեց նա: