2 րոպեի ընթերցում
ԵՐԵՎԱՆ, 22 ՀՈՒՆԻՍԻ, ԱՐՄԵՆՊՐԵՍ: Երևանի փոխոստիկանապետ Վալերի Օսիպյանը ևս մեկ անգամ նշեց, որ ՀՀ Ոստիկանության պետ Վլադիմիր Գասպարյանի կողմից փոխացնված՝ Հայաստանի Հանրապետության Նախագահ Սերժ Սարգսյանի հետ հանդիպելու առաջարկը մնում է ուժի մեջ: Այս մասին Բաղրամյան պողոտայում հավաքված ցուցարարներին հայտնեց Երևան քաղաքի փոխոստիկանապետ, գնդապետ Վալերի Օսիպյանը: Ինչպես հաղորդում է «Արմենպրես»-ի թղթակիցը, փոխոստիկանապետը քաղաքացիներին հայտնեց, որ կարող են հինգ հոգանոց խմբով գնալ հանդիպման: «Ավելի ճիշտ կլինի, որպեսզի դուք լսեք Նախագահի առաջարկը, խումբ կազմեք և հանդիպեք նրա հետ: Ես ձեզ վստահեցնում եմ, որ դուք հանդիպումից հետո գոհ կմնաք»:
Վալերի Օսիպյանը նշեց, որ թեև ոստիկանները նույնպես դժգոհ են թանկացումներից, սակայն որևէ անօրինականություն չեն հանդուրժի: Փոխոստիկանապետն ընդգծեց, որ թեև հավաքն ընթանում է խաղաղ, այն մնում է անօրինական: Ցուցարարները կրկին մերժել են առաջարկը և շարունակում են նստած մնալ Բաղրամյան փողոցում:
Երթի առիթող հայտարարություն է տարածել Հայաստանի Հանրապետության ոստիկանությունը, որը էլեկտրաէներգիայի թանկացման դեմ կազմակեպված երթը դեպի ՀՀ Նախագահի նստավայր համարում է անօրինական:Ոստիկանության հաղորդագրությունում նշվում է, որ երթի մասնակիցների կողմից ոստիկանության ծառայողների օրինական պահանջներին չենթարկվելու կամ դիմադրություն ցույց տալու դեպքերում երթը այլևս չի համարվի խաղաղ: