2 րոպեի ընթերցում
ԵՐԵՎԱՆ, 10 ՀՈՒՆԻՍԻ, ԱՐՄԵՆՊՐԵՍ: ՀՀ կրթության և գիտության նախարար Արմեն Աշոտյանի«Ինձ խոստացիր» երգի տեսահոլովակը պատրաստ է. այն արդեն համացանցում է:
«Արմենպրես»-ի փոխանցմամբ՝ նախարարն իր ֆեյսբուքյան էջում տարածել է տեսահոլովակը՝ նշելով. «Ահա և անակնկալը` ինձ և ձեզ համար` Հայկոյի կատարմամբ արդեն սիրված դարձած երգի տեսահոլովակը ռեժիսոր Լուսինե Մարտիրոսյանի կողմից: Շատ շնորհակալ եմ»:
Երգը յուրահատուկ նվեր է հայ կանանց և աղջիկներին: Հիշվող, պարզ, բայց ոչ պարզունակ, զգացմունք արթնացնող երգ. այսպես է իր ստեղծագործությունը բնորոշում ԿԳ նախարարը:
«Հայկոն և՛սիրված, ճանաչված երգիչ է, և՛ միաժամանակ ինձ մտերիմ ընկեր: Ուստի կրկնակի եռանդ է գործադրվել, որպեսզի այդ երգը կատարվի այնպես, որ հասանելի լինի յուրաքանչյուր մարդու զգացմունքներին: Արդինի ստուդիայում բարձրակարգ պրոֆեսիոնալներ են աշխատում, և Արման Սահակյանի պրոդյուսերությամբ ստացվեց նաև համախմբել բոլորի ստեղծագործական ներուժը: Ես էլ իմ համեստ աշխատանքով փորձեցի օգնել, որպեսզի ստեղծվի հիշվող, գուցե պարզ, բայց ոչ պարզունակ, յուրաքանչյուրի սրտում ինչ-որ հետք, հիշողություն, զգացմունք արթնացնող երգ: Ուզում եմ հատուկ շեշտել, որ երգը էստրադային է, հետևաբար իրենց գեղարվեստական առումով ո՛չ խոսքը, ո՛չ երաժշտությունը չեն հավակնում լինել բարձրարժեք, բայց, այնուհանդերձ, բավականին անկեղծ եմ եղել ստեղծագործելիս»,-«Արմենպրես»-ի հետ զրույցում ավելի վաղ նշել էր Արմեն Աշոտյանը: