2 րոպեի ընթերցում
ԵՐԵՎԱՆ, 23 ԱՊՐԻԼԻ, ԱՐՄԵՆՊՐԵՍ: Ռուսաստանցի հայտնի գործարար եւ մեկենաս Գերման Ստերլիգովը Երևանի պետական համալսարանին նվիրեց հրատարակություններ, որտեղ վկայություններ կան նաև մինչև ցեղասպանությունը հայերին պատկանած բնակավայրերի մասին, ինչպես նաև Մեծ եղեռնին վերաբերող փաստաթղթեր:
«Արմենպրես»-ի փոխանցմամբ` ռուս մեկենասը հայտնեց, որ իրենց հրատարակություններում ներկայացված է համաշխարհային պատմությունը` տարբեր ազգերի և պետություների մասին մանրամասն ուսումնասիրություններով:
«Նման հրատարակություններ ստեղծելու անհրաժեշտություն զգացի այն ժամանակ, երբ տեսա, որ երեխաներս դպրոցում սովորում են «ոչ հավաստի» պատմություն: Սկսեցի հավաքել ձեռագրեր, և արդյունքում ստեղծվեցին այս հրատարակությունները, որոնք ճշգրտորեն են ներկայացնում պատմական անցքերը: Սա կարևոր է Հայաստանի համար, քանի որ ձեռագրերում բազում վկայություններ կան նաև Հայոց ցեղասպանության և հայերին պատկանած տարածքների մասին»,- ասաց Ստերլիգովը: Նա տեղեկացրեց, որ հայերին պատկանած բոլոր բնակավայրերի մասին հավաստի տեղեկություններ կան, որոնք արժեքավոր են հետազոտողների համար:
Օգտվելով ստեղծված հնարավորությունից` Գերման Ստերլիգովը խոսեց նաև Հայոց ցեղապսանությւան ճանաչման կարևորության մասին: «Ես ձեր կողքին եմ այս արդար պայքարում, քանի որ Ցեղասպանության ճանաչումն է ճիշտ ուղին: Կարծում եմ` բոլոր արդար ու անկեղծ մարդիկ պետք է գնան ճանաչան ուղիով»,- ասաց նա:
ԵՊՀ ռեկտոր Արամ Սիմոնյանը ռուս մեկենասին վստահեցրեց. «Սրանք լուրջ փաստաթղթեր են մեր համալսարանականների ու դասախոսների համար, ովքեր հետազոտություններ են իրականացնելու տարբեր հարցերի շուրջ: Համոզված եմ, որ կլինեն շատ գիտնականններ, ովքեր կօգտագործեն այս ձեռագրերում ամփոփված վկայությունները»,- հավելեց նա: Արամ Սիմոնյանը իր հերթին Հայաստանին վերաբերող գրքեր նվիրեց ռուս մեկենասին: