1 րոպեի ընթերցում
ԵՐԵՎԱՆ, 13 ԱՊՐԻԼԻ, ԱՐՄԵՆՊՐԵՍ: Ազգային ժողովի պատգամավոր Նիկոլ Փաշինյանն անդրադարձել է Երևանի կենտրոնում աշխարհահռչակ ռեփ երգիչ Քանյե Ուեսթի համերգին: «Արմենպրես»-ի հաղորդմամբ՝ «Ֆեյսբուք»-ի իր էջում պատգամավորը հումորով հետևյալ գրառումն է կատարել.
«Գիշերը, փաստորեն, Քանյե Ուեսթն ու հարյուրավոր քաղաքացիներ լեգենդ են կերտել Երեւանի պատմության համար: Դա իրադարձություն է, որի մասին դեռ խոսելու են ու խոսելու, դեռ պատմելու են ու պատմելու: Դժվար չէ կանխատեսել, որ մի օր այդ իրադարձությունը նշանավորող արձան կհայտնվի Կարապի լճի կենտրոնում»:
Ապրիլի 12-ին «Գրեմմի»-ի բազմակի դափնեկիր Քանյե Ուեսթն, ով կնոջ՝ հեռուստաաստղ Քիմ Քարդաշյանի հետ գտնվում է Երևանում, Երևանի Կարապի լճի հարևանությամբ անվճար համերգ է տվել: Անվճար համերգի մասին երկրպագուներին տեղեկացրել է Քիմ Քարդաշյանը: «Թվիթեր»-ի իր միկրոբլոգում վերջինս հետեւյալ գրառումն է թողել: ‹‹Քանյեն Երեւանում անվճար համերգ է տալիս բոլորի համար: Այսօր կեսգիշերին՝ Կարապի լճի մոտ: Կտեսնվենք այնտեղ››,- գրել է Քարդաշյանը:
