Լիլիթ Մարգարյանը ներկայացրեց Ցեղասպանության տարելիցին նվիրված «Gallery 100» նոր հավաքածուն
5 րոպեի ընթերցում
ԵՐԵՎԱՆ, 8 ԱՊՐԻԼԻ, ԱՐՄԵՆՊՐԵՍ: Գունեղ, ինքնատիպ և հետաքրքիր. այսպես են բնորոշում հայրենական նորաձևության հիմնադիրներից մեկի՝ Լիլիթ Մարգարյանի«Gallery 100» նոր հավաքածուն: Հայոց ցեղասպանության տարելիցին նվիրված հավածուն՝ իր ողջ հմայքով, հայ հանրությունը դիտելու հնարավորություն ստացավ ապրիլի 7-ին «Meridian Expo Centre» կենտրոնում։ Միջոցառումն իրականացվեց ՀՀ առաջին տիկին Ռիտա Սարգսյանի աջակցությամբ: Առաջին տիկինն իր ներկայությամբ պատվեց «Gallery 100» հավաքածուի անդրանիկ ցուցադրությունը:
Միջոցառման իրականացմանը նպաստել էր նաև ՀՀ սփյուռքի նախարարությունը: Հավաքածուի հիմքում հայ կնոջ կերպարն է ու նրա ոճի զարգացումը, որն ուղեկցվել է պատմական և տարածքային բազմազան գործոնների ազդեցությամբ: Դիզայները կատարելության է հասցնում 1915-ին վերապրած հայ կին-անհատին, ով ոչ միայն կարողացել է պահպանել բարոյական բարձր արժեքները, այլև գեղարվեստի մեծ վարպետների սերունդ է դաստիարակել: Հավաքածուի հիմնական նմուշները զգեստներն են, որոնք 20-րդ հարյուրամյակի հայ նկարիչների ստեղծագործություններից ոգեշնչվելու արդյունք են: Ներկայացվող ցուցադրության առանձնահատկություններից էին ոսկերիչ- դիզայներ Նուռի՝ հատուկ այս միջոցառման առթիվ ստեղծած աքսեսուարները, որոնք զարդարում էին հավաքածուի նմուշները:
Լիլիթ Մարգարյանի հավաքածուի հիմքում Սարյանի, Հակոբյանի, Կալենցի, Գառզուի և այլ մեծանուն նկարիչների փորագրանկարներն են:
«Հայ ազգն ունի հարյուրավոր տաղանդավոր նկարիչներ: Որոշեցի, որ հայ կինը միշտ տանջված չի եղել: Գտա ազնվազարմ, բարձրաճաշակ կանանց նկարներ: Որոշեցի սկսել այդտեղից. ինչպիսի՞ն է եղել հայ կինը և ի՞նչ պատահեց նրա հետ: Հայ կինը հայրենակորույս եղավ, բայց չդավաճանեց հայրենիքը»,-«Արմենպրես»-ի փոխանցմամբ՝ նշեց Լիլիթ Մարգարյանը:
ՀՀ սփյուռքի նախարար Հրանուշ Հակոբյանը շնորհավորեց բոլորին ցուցադրության առթիվ: «Մենք տեսանք գույներ, համադրություններ, հակադրություններ: Տեսանք մեր հզոր նկարիչներից վերցված գույներ և ձևեր: Ես կարծում եմ, որ ցուցադրությունը ստացվեց: Պետք է շնորհավորենք մեր սիրելի Լիլիթին՝ իր փայլուն մտահղացման համար»,-նշեց Հրանուշ Հակոբյանը:
Նախարարի խոսքով՝ այսքան խստապահանջ հանդիսատեսին 100 զգեստ ներկայացնելը միշտ չէ, որ հնարավոր է: «Ես ուրախ եմ, որ այսօր մեր աղջիկներն ու կանայք ընտրելու հնարավորություն ունեն, և կարող են ընտրել հատկապես հայկական նորաձևություն և ոչ՝ օտար: Ուրախ եմ, որ մեր նորաձևության մեծերը «ձեռք են մեկնում» մեր նկարիչ մեծերին»,-հավելեց նա: Հրանուշ Հակոբյանն ընդգծեց, որ ցուցադրության համար հատկացվել է երեք միլիոն դրամ գումար:
ՀՀ մշակույթի նախարար Հասմիկ Պողոսյանը ևս ողջունեց ցուցադրությունը: «Ընդհանրապես հետաքրքիր էր գաղափարը. անդրադարձ էր կատարվում մեր անվանի վարպետների ստեղծագործությունների հերոս հանդիսացող կանանց, իրենց ամբողջական կերպարին և կրած զգեստներին: Մեր ժամանակներում դրանք վերարտադրելու փորձ կատարվեց, և, կարծում եմ, հաջող փորձ էր: Հաճույք ստացա ցուցադրությունից: Շատ հաճելի անակնկալ էր բոլոր կանանց համար»,-նշեց Հասմիկ Պողոսյանը:
Ցուցադրության ընթացքում ներկայացվեց մի ամբողջ դարաշրջան՝ մարմնավորված թափանցիկ շիֆոնի ծփանքներով, նրբերանգ քաշմիրով, կաշվե ժանյակներով ու մանեկեններով: Երկրաչափական ձևվածք, անխառն (մոնոքրոմ) գույներ, անհարմարվողականություն (նոնկոնֆորմիզմ), մինիմալիզմ և բազմաոճություն (էկլեկսիկա). հավաքածուն իրավամբ կարելի է համարել ուլտրանորաոճ: Համաշխարհային պոդիումների առաջադրած պահանջն էլ հենց դա է: Ֆուտուր ուրվագծերը ապշելու չափ ներդաշնակ են հայուհու կողմից մշտապես սիրված հայկական ավանդական օձիքների հետ՝ մի ամբողջ ժողովրդի պատմությամբ խամրած երանգներով:
Մանեքենուհիների սանրվածքն ապահովել էր ոճաբան Սեդրակ Ղամբարյանը, դիմահարդարումը՝ Make-Up Atelier-ը՝ Մադլեն Խաչատրյանի ղեկավարությամբ: