Պատգամավորները նշում են, որ Օսմանյան կայսրությունում եզդիների ցեղասպանության վերաբերյալ փաստեր չկան
5 րոպեի ընթերցում
ԵՐԵՎԱՆ, 16 ՓԵՏՐՎԱՐԻ, ԱՐՄԵՆՊՐԵՍ: Ազգային ժողովի արտաքին հարաբերությունների մշտական հանձնաժողովի անդամ Ալեքսանդր Արզումանյանը նպատակահարմար չի համարում, որպեսզի հույների և ասորիների ցեղասպանությունը դատապարտող հայտարարության մեջ ներառվեն նաև եզդիները:
Ազգային ժողովի արտաքին հարաբերությունների մշտական հանձնաժողովում պատգամավոր Զարուհի Փոստանջյանի՝ «Օսմանյան կայսրությունում հույների, ասորիների, եզդիների եւ այլ կրոնական ու ազգային փոքրամասնությունների նկատմամբ իրականացված ցեղասպան քաղաքականությունը` որպես մարդկության դեմ ուղղված ծանրագույն հանցագործություն համարելու եւ դատապարտելու մասին» հայտարարության նախագծի քննարկման ընթացքում Արզումանյանն ընդգծեց, որ Առաջին աշխարհամարտի տարիներին Օսմանյան կայսրությունում հույների և ասորիների ցեղասպանության վերաբերյալ կան խոսուն փաստեր, սակայն նման փաստեր չկան եզդիների ցեղասպանության վերաբերյալ:
«Եզդիների ցեղասպանությունը վիճահարույց խնդիր է, և մենք հիմա եզդիական համայնքի հետ քննարկում ենք այդ հարցը, թե ինչպիսի ձևակերպումներ կարող ենք տալ: Դրա համար ես նպատակահարմար չեմ համարում տիկին Փոստանջյանի ներկայացրած նախագիծը: Ես կողմ եմ, որպեսզի մենք ընդունենք պարոն Շարմազանովի ներկայացրած նախագիծը, որը վերաբերում է հույների և ասորիների ցեղասպանությանը, իսկ եզդիների ցեղասպանության հարցը կարող է առանձին քննարկման առարկա դառնալ»,- ընդգծեց Արզումանյանը:
ԱԺ փոխնախագահ Էդուարդ Շարմազանովն ընդգծեց, որ իր նախաձեռնությամբ ներկայացված նախագիծը վերաբերում է միայն հույների և ասորիների ցեղասպանությանը, քանի որ եզդիների ցեղասպանության վերաբերյալ պատմական հստակ փաստեր չկան: «Մենք հարգում ենք մեր բարեկամ եզդի ժողովրդին և մշտապես կիսում ենք նրանց ցավը: Եզդիները մեր բարեկամներն են, և մենք ոչ մի դեպքում չենք կարող նրանց դեմ հայտարարություն ընդունել: Այս պահին մենք եզդիների ցեղասպանության վերաբերյալ հստակ պատմական փաստեր չունենք: Եթե եզդիների նկատմամբ եղել է ցեղասպանություն, մենք դա կարող ենք առանձին քննարկման առարկա դարձնել»,- ասաց Շարմազանովը:
ԱԺ ՀՀԿ խմբակցության պատգամավոր Շիրակ Թորոսյանը ևս նշեց, որ նպատակահարմար չի համարում հույների և ասորիների ցեղասպանությունը դատապարտող հայտարարության մեջ ներառել եզդիներին: Թորոսյանն էլ ընդգծեց, որ եզդիները հայ ժողովրդի բարեկամներն են, և նրանց խնդիրները մշտապես Հայաստանի իշխանությունների ուշադրության կենտրոնում են: «Սակայն այս պահին մենք չենք կարող հայտարարության մեջ ներառել եզդիների ցեղասպանությունը, քանի որ այդ մասին մենք հստակ փաստեր չունենք»,- նկատեց պատգամավորը:
ԱԺ ՀՀԿ խմբակցության պատգամավոր Սամվել Ֆարմանյանն էլ նշեց, որ եզդի ժողովրդի նկատմամբ ցեղասպանություն իրականացվել է Իրաքում «Իսլամական պետություն» խմբավորման կողմից, ինչը կարող է առանձին քննարկման առարկա դառնալ: «Եզդի ժողովրդի նկատմամբ «Իսլամական պետություն» ահաբեկչական խմբավորման կողմից իրականացված ցեղասպանության մասին խոսում են նաև ցեղասպանագետները և պատմաբանները: Մենք սա կարող ենք առանձին քննարկման առարկա դարձնել: Սակայն Առաջին աշխարհամարտի ընթացքում և դրանից հետո Օսմանյան կայսրությունում եզդիների նկատմամբ իրականացված ցեղասպանությունը ես ոչ կարող եմ հերքել, ոչ էլ հաստատել, քանի որ չունեմ պատմական փաստեր: Ես՝ որպես պատմաբան, նպատակահարմար չեմ համարում ասորիների և հույների ցեղասպանությունը դատապարտող հայտարարության մեջ եզդիներին ներառելը»,- եզրափակեց Ֆարմանյանը:
ՀՀ ԱԺ արտաքին հարաբերությունների մշտական հանձնաժողոիվ նախագահ Արտակ Զաքարյանն էլ չբացառեց, որ գուցե հետագայում ՀՀ ԱԺ-ն անդրադառնա եզդիների ցեղասպանությանը, երբ դրա համար կլինեն անհրաժեշտ պատմական հիմքեր: «Մենք այսօր, ցավոք, չենք կարող հիմնավոր ասել, որ Օսմանյան կայսությունում եզդիների ցեղասպանության համար կան պատմական հիմքեր: Այս հարցը պետք է քննարկվի պատմաբանների հետ, նոր միայն Ազգային ժողովը կանդրադառնա դրան»,- ասաց Զաքարյանը: