Էդուարդ Շարմազանովը կոչ է անում Գյումրիի դեպքերի կապակցությամբ զերծ մնալ զգացմունքային գնահատականներից

ԵՐԵՎԱՆ, 15 ՀՈՒՆՎԱՐԻ, ԱՐՄԵՆՊՐԵՍ: Ազգային ժողովի փոխնախագահ Էդուարդ Շարմազանովը կոչ է անում չքաղաքականացնելԳյումրիի սպանությունը և զերծ մնալ զգացմունքային գնահատականներից: ՀՀԿ գործադիր մարմնի նիստի ավարտից հետո լրագրողների հետ զրույցում Շարմազանովն ընդգծեց, որ տեղի ունեցածը մեծ ողբերգություն է, սակայն զգացմունքային գնահատականները, հուզականության չափաբաժնի ավելացումը չի կարող օգուտ տալ: «Սա իրավական խնդիր է և քաղաքական գնահատականները, կարծում եմ, որևէ մեկի շահերից չեն բխում»,- «Արմենպրես»-ի հաղորդմամբ՝ նշեց նա:

ԱԺ փոխնախագահը հիշեցրեց, որ ՀՀ գլխավոր դատախազը ծավալուն ասուլիսով է հանդես եկել, ցուցարարների հետ հանդիպել է և շատ հստակ ներկայացրել է հարցը: «Եվս մեկ անգամ կրկնում եմ, որ մենք ամեն ինչ անելու ենք, որպեսզի հանցագործը պատժվի օրենքի ողջ խստությամբ: Այս մասին խոսել է թե՛ Հայաստանի Հանրապետության գլխավոր դատախազը, թե ռուսական ռազմաբազայի հրամանատարությունը, իսկ մնացած հարցերն արդեն իրավական են, և քաղաքական գնահատականները տեղին չեն` ավելորդ զգացմունքայնություն են: Բոլոր այն քաղաքական գործիչները, ովքեր փորձում են այս իրավիճակից դիվիդենտներ շահել, նրանք լավ բան չեն անում»,- ընդգծեց Շարմազանովը:

Անդրադառնալով խոսակցություններին, թե հարկավոր է Գյումրիից հանել ռուսական ռազմաբազան՝ նա նշեց, որ այդ հարցը երբևէ չի կարող քննարկվել, և այս դեպքը որևէ կերպ չի կարող ազդել հայ-ռուսական հարաբերությունների վրա: «Ես հիմա ասում եմ` տականքը ազգություն չունի: Հիմա խնդրում եմ` ասեք ինձ՝ Նաիրի Հունանյանը ո՞ր ազգի ներկայացուցիչ էր: Կրկնում եմ՝ տականքն ազգություն չունի»,- շեշտեց նա:

Դիտարկմանը, թե ՌԴ Նախագահ Վլադիմիր Պուտինը Գյումրիի դեպքերի կապակցությամբ ցավակցական հեռագիր չի հղել, Շարմազանովն ընդգծեց, որ ՌԴ ԱԳ նախարար Սերգեյ Լավրովն արդեն ցավակցել է և պետք չէ փորձել սեպ խրել հայ-ռուսական հարաբերությունների մեջ:

Անդրադառնալով Գյումրիում տեղի ունեցած բախումներին՝ Շարմազանովն ընդգծեց, որ ցանկացած անօրինական գործողություն անընդունելի է: Նա հավելեց, որ ողբերգությունն արդեն կատարվել է՝ կոչ անելով բոլորին հանդարտություն պահպանել: Շարմազանովը ևս մեկ անգամ վստահեցրեց, որ ՀՀ իշխանություններն ամեն ինչ անելու են, որպեսզի ոճրագործը պատժվի օրենքի ողջ խստությամբ:

Հունվարի 15-ին Գյումրիում Ավետիսյանների ընտանիքի հուղարկավորությունից հետո իրավիճակը Գյումրիում լարվեց: Հանրահավաքի մասնակիցները Շիրակի մարզի դատախազության շենքի առջև հանդիպեցին ՀՀ գլխավոր դատախազ Գևորգ Կոստանյանին, ով վստահեցրեց, որ դիմելու է ռուսական կողմին` ոճրագործին հայկական հայաստանյան իրավապահներին հանձնելու համար: Այնուհետև հանրահավաքի մասնակիցները պահանջեցին նկարահանել ոճրագործին, որպեսզի հավաստիանան, որ նա գտնվում է Գյումրիում: Դատախազության շենքի մոտից հանրահավաքի մասնակիցներն ուղևորվեցին ՌԴ հյուպատոսարանի շենք, որտեղ էլ ցուցարարների և ոստիկանների միջև արձանագրվեց լարվածություն, ինչի հետևանքով 15 անձ, որոնցից 6-ը ոստիկաններ, տեղափոխվեցին հիվանդանոց: Վերջին տեղեկություններով` բոլոր քաղաքացիական անձինք և 3 ոստիկաններ դուրս են գրվել հիվանդանոցից: «Ժառանգություն» խմբակցության պատգամավոր Զարուհի Փոստանջյանը և «Բարգավաճ Հայաստան» խմբակցության պատգամավոր Մարտուն Գրիգորյանը կոչ արեցին հանդարտվել հավաքվածներին և վստահեցրին, որ ՀՀ գլխավոր դատախազ Գևորգ Կոստանյանը պայմանավորվածություն է ձեռք բերել ու իրենք այժմ ուղևորվելու են ռազմաբազա և հավաստիանալու, որ ոճրագործը գտնվում է Գյումրիում:Ցուցարարները կրկին շարժվել են դատախազության շենք: