3 րոպեի ընթերցում
ԵՐԵՎԱՆ, 10 ԴԵԿՏԵՄԲԵՐԻ, ԱՐՄԵՆՊՐԵՍ: Մոսկայի Բասմանյան դատարանը չորս ամսով՝ մինչեւ 2015 թվականի ապրիլի 19-ը, երկարացրել է հայ գործարար Լեւոն Հայրապետյանի տնային կալանքի ժամկետը, տեղեկացնում է «Արմենպրես»-ը՝ հղում անելով ՏԱՍՍ-ին:
«Քննության առնելով կողմերի փաստարկները՝ դատարանը գալիս Է այն եզրակացության, որ մեղադրյալ Հայրապետյանի նկատմամբ խափանման միջոցը երկարացնելու քննիչի միջնորդությունը ենթակա Է բավարարման»,-հայտարարել է դատավոր Արթուր Կարպովը:
Ինչպես հայտնի Է դարձել դատարանում, գործով հետաքննության ժամկետը երկարացվել Է մինչեւ ապրիլի 28-ը:
Հայրապետյանին նաեւ արգելված Է հեռանալ այն տան սահմաններից, որտեղ նա ապրում Է, օգտվել հեռախոսից եւ կապի որեւԷ այլ միջոցից, ներառյալ Համացանցը, կամ շփվել որեւԷ մեկի հետ՝ բացառությամբ մոտ ազգականների, որոնց շրջանակը սահմանված Է օրենքով, հետաքննության ներկայացուցիչների ու փաստաբանների:
Ընդունելով որոշում՝ դատարանը հաշվի Է առել Հայրապետյանի անձին վերաբերող տվյալները, ինչպես նաեւ նրան վերագրվող հանցագործության ծանրության աստիճանը: Բացի այդ, նա ունի Ռուսաստանի եւ Հայաստանի քաղաքացիություն, ինչպես նաեւ անշարժ գույք ԱՄՆ-ում եւ Մոնակոյում: Այդ կապակցությամբ դատարանը համարել Է, որ նա կարող Է թաքնվել հետաքննությունից, ինչպես նաեւ օգտվել իր կապերից՝ հետաքննության ընթացքին խոչընդոտելու համար:
Պաշտպանությունը հայտարարել Է դատարանի վճիռը բողոքարկելու մտադրության մասին:
65-ամյա ձեռնարկատերը հուլիսի 15-ին ձերբակալվել է Մոսկվայի Դոմոդեդովո օդանավակայանում, ուր նա ժամանել էր Նիցայից: Հետաքննությունը պնդում Է, որ «Բաշնեֆտ»-ի նախկին ղեկավար Ուրալ Ռախիմովը Հայրապետյանի հետ միասին մշակել են Բաշկիրիայի ջերմաէներգետիկական համալիրի ձեռնարկությունների բաժնետոմսերի հափշտակման հանցավոր պլան: Իր հերթին, «Սիստեմա» ֆինանսա-արդյունաբերական խումբ ԲԲԸ-ի համասեփականատեր Վլադիմիր Եվտուշենկովը կազմակերպել է հանցավոր ճանապարհով ստացված ունեցվածքի օրինականացումը:
Հայրապետյանը ձերբակալվել է Բաշկիրիայից նախկին սենատոր Իգոր Իզմեստեւի խոստովանական ցուցմունքներից հետո, որը ցմահ բանտարկության է դատապարտված մի շարք առանձնապես ծանր հանցագործությունների համար: Նախկին սենատորը պատմել է, որ Հայրապետյանն իբր 2009 թվականին մասնակցել է Ուրալ Ռախիմովի կողմից «Բաշնեֆտ»-ի բաժնետոմսերը «Սիստեմա»-ի կառույցներին վաճառելուն:
Դրա հետ մեկտեղ Հայրապետյանի նկատմամբ հարուցվել Է եւս մեկ քրեական գործ՝ խարդախության մասին, ըստ որի՝ նա Իզմեստեւի մորից 700 հազար դոլար Է հափշտակել:
Հուլիսի 17-ին Մոսկվայի Բասմանյան դատարանը Հայրապետյանին կալանքի տակ էր դրել, բայց հոկտեմբերի 3-ին նրան փոխադրել էին տնային կալանքի՝ առողջական վիճակի կապակցությամբ: Գործարարը չի ընդունում մեղքը եւ մերժում է իրեն առաջադրված բոլոր մեղադրանքները: