2 րոպեի ընթերցում
ԵՐԵՎԱՆ, 2 ՀՈԿՏԵՄԲԵՐԻ, ԱՐՄԵՆՊՐԵՍ: Արագածոտնի մարզի Սասունիկ համայնքում հոկտեմբերի 4-ին կանցկացվի «Էպոսի օր» հանրապետական փառատոնի ամփոփման հանդիսավոր միջոցառումը: Ինչպես «Արմենպրես»-ին տեղեկացրին ՀՀ մշակույթի նախարարության հասարակայնության հետ կապերի բաժնից, 2014թ. ապրիլ-սեպտեմբեր ամիսներին հանրապետության գյուղական և քաղաքային համայնքներում, հանրակրթական դպրոցներում և մի քանի տասնյակ մշակութային ու մարզական հաստատություններում անցկացվել են էպիկական ժառանգության պահպանության ու հանրահռչակման միջոցառումներ` դասախոսություններ և ընթերցումներ, գեղարվեստի ցուցադրություններ, ազգային երգի ու պարի համույթների ելույթներ:
Փառատոնի նպատակն է հայկական բանահյուսական ժառանգության գլուխգործոց հանդիսացող «Սասնա ծռեր» էպոսի պահպանումը, դրանում ամփոփված արժեհամակարգին երիտասարդությանը հաղորդակից դարձնելը, ավանդական, հոգևոր-մշակութային արժեքների նկատմամբ հարգանքի ու արժևորման մթնոլորտի ամրապնդումը:
ՀՀ մշակույթի նախարարության աջակցությամբ, «Սասնա տուն» հասարակական կազմակերպությունը` 2011 թվականից կազմակերպում է «Սասնա ծռեր» էպոսի հանրահռչակմանը միտված «Էպոսի օր» հանրապետական փառատոնը, որն իրենից ներկայացնում է համալիր միջոցառումներ: Փառատոնի ամփոփումն ավանդաբար կազմակերպվում է յուրաքանչյուր տարվա հոկտեմբերի առաջին շաբաթ օրը Արագածոտնի մարզի որևէ համայնքում: Նախորդ տարիներին «Ապրենք էպոսով» կարգախոսով փառատոնն անցկացվել է մարզի Ուջան, Իրինդ, Ներքին Բազմաբերդ համայնքներում:
«Սասնա ծռեր կամ Սասունցի Դավիթ»էպոսի կատարողական դրսևորումները» հայտը 2012 թվականին ընդգրկվել է ՅՈՒՆԵՍԿՕ-ի մարդկության ոչ նյութական մշակութային ժառանգության ներկայացուցչական ցանկում: