Քաղաքագետը շփման գծում Ադրբեջանի ակտիվությունը նաև կապում է այդ երկրում ծավալվող կրոնական հակասությունների հետ

ԵՐԵՎԱՆ, 5 ՕԳՈՍՏՈՍԻ, ԱՐՄԵՆՊՐԵՍ: Վերջին հայ-ադրբեջանական շփման գծում ադրբեջանական կողմի նկատվող ակտիվությունը պայմանավորված է այդ երկրում վերջին շրջանում նկատվող կրոնական հակասություններով շիաների և սուննիների միջև: Օգոստոսի 5-ին լրագրողների հետ հանդիպմանը նման կարծիք հայտնեց քաղաքագետ Լևոն Մելիք-Շահնազարյանը: «Մեզ մոտ այդ հանգամանքի վրա այդքան էլ մեծ ուշադրություն չենք դարձնում, սակայն ադրբեջանական կողմի վերջին ակտիվությունը կապ ունի նաև այդ երկրում լայն բնույթ ստացած կրոնական հակասությունների հետ: Շփման գծում լարվածություն ստեղծելով՝ Ադրբեջանը փորձեց ընդհանուր թշնամու պատկեր ցույց տալ և այդպիսով մեղմել այդ հակասությունները»,- «Արմենպրես»-ի հաղորդմամբ՝ ասաց նա:

Ադրբեջանական կողմի ակտիվության երկրորդ պատճառը քաղաքագետը համարում է այն հանգամանքը, որ Ադրբեջանի պաշտպանության նախարարը, որը նշանակվել է այս տարվա հոկտեմբերին, սակայն մինչ այս պահը որևէ հաջողություն չի գրանցել և նախագահին ներկայացնելու ոչինչ չունի, ուստի ինչ-որ քայլեր է ձեռնարկել միանգամից մեծ հաջողություն գրանցելու համար, սակայն ստացվել է հակառակ պատկերը: «Հատկանշական է, որ այդ դիվերսիոն գործողությունների ընթացքում Ադրբեջանի նախագահը և պաշտպանության նախարարը Ադրբեջանում չեն եղել, և երևի նրանք պլանավորել էին Ադրբեջան վերադառնալ արդեն տրիումֆատորի կարգավիճակով, սակայն ստացվել է այնպես, որ վերադարձել են պարտված»,- ասաց Մելիք-Շահնազարյանը:

Երրորդ գործոնը, ըստ քաղաքագետի, արտաքին քաղաքական է և կապված է Ադրբեջան-ԱՄՆ հարաբերությունների հետ: Մելիք-Շահնազարյանը հիշեցրեց, որ վերջերս Ադրբեջանը արդեն հայտարարել է, որ պատրաստ է ԱՄՆ-ին տրամադրել իր օդանավերը, երկաթուղային հնարավորությունները և տարածքը՝ Աֆղանստանից իր զենքերը դուրս բերելու համար: Միևնույն ժամանակ, ԱՄՆ կոնգրեսն նախագիծ է քննարկում, որով առաջարկվում է սահմանել, որ Վրաստանը, Ուկրաինան և Ադրբեջանը ԱՄՆ-ի դաշնակիցներն են ՆԱՏՕ-ից դուրս: «Հիմա Ադրբեջանը ցանկանում է հասնել նրան, որ դառնա ԱՄՆ ռազմավարական դաշնակիցը ՆԱՏՕ-ից դուրս և դրա համար հարձակումներ է իրականացնում՝ ԱՄՆ-ին և Արևմուտքին ցույց տալու համար, թե իրենք պատժում են Ռուսաստանի ռազմավարական դաշնակցին»,- ընդգծեց քաղաքագետը:

Անցած գիշեր և այսօր առավոտյան ադրբեջանական կողմը կրկին խախտել է հրադադարի պահմանման ռեժիմը հայ-ադրբեջանական պետական սահմանագոտու տարբեր հատվածներում` կիրառելով հրաձգային, այդ թվում` խոշոր տրամաչափի զինատեսակներ:

Ստացված օպերատիվ տվյալների համաձայն` օգոստոսի 4-5-ն ընկած ժամանակահատվածում հայ-ադրբեջանական պետական սահմանագոտում հրադադարի պահպանման ռեժիմը խախտվել է 45 անգամ: Տարբեր տրամաչափի հրաձգային զինատեսակներից հայ դիրքապահների ուղղությամբ արձակվել է ավելի քան 600 կրակոց:Հայկական կողմից պատասխան կրակ է բացվել 11 անգամ: Հակառակորդի ուղղությամբ արձակվել է 211 կրակոց:Հայկական կողմից տուժածներ չկան:

ՀՀ զինված ուժերը վստահորեն վերահսկում են սահմանային իրավիճակը շփման գծի ամբողջ երկայնքով, խստորեն հետևում են հրադադարի ռեժիմի պահպանմանը և իրավիճակին համարժեք գործողությունների են դիմում միայն հակառակորդի կողմից արձանագրվող նպատակային խախտումների դեպքում: