2 րոպեի ընթերցում
ԵՐԵՎԱՆ, ՀՈՒԼԻՍ 31, ԱՐՄԵՆՊՐԵՍ: Հայաստանի ինտելեկտուալ խաղերի հնգակի չեմպիոն «Պերեզագրուզկա» թիմը, ևս վեց հայաստանյան թիմեր օգոստոսի 1-3-ը կմասնակցեն Բաթումում կայանալիք ինտելեկտուալ խաղերի «Սևծովյան 3-րդ բաց առաջնությանը»: Այս տարի մրցաշարին, որի շրջանակում անցկացվում են «Ի՞նչ: Որտե՞ղ: Ե՞րբ,», «Բրեյն ռինգ», «Քո խաղը» և այլ խաղեր, կմասնակցեն 55 թիմ Վրաստանից, Հայաստանից, Ադրբեջանից, Ռուսաստանից, Ուկրաինայից և Գերմանիայից:
«Հայկական ինտելեկտն այն բրենդն է, որով մենք հպարտանում ենք, լինի դա շախմատի մրցում, դպրոցական օլիմպիադա, թե ինտելեկտուալ խաղերի առաջնություն: Ի դեպ, հայաստանյան «Պերեզագրուզկա» թիմը տվյալ մրցաշարում մասնակցող թիմերի մեջ ունի ամենաբարձր վարկանիշը», - «Արմենպրես»-ի հետ զրույցում ասաց «Պերեզագրուզկա» թիմի ավագ, Հայաստանի գիտակների ասոցիացիայի նախագահ Տիգրան Քոչարյանը:
Նա նաև հավելեց, որ Բաթումում կայանալիք մրցաշարին Հայաստանի գիտակների ասոցիացիայի չորս լավագույն թիմերի մասնակցությունը հովանավորել է ՀՀ կրթության և գիտության նախարարությունը:
Թվով երրորդ «Սևծովյան բաց առաջնությունը» փոխարինում է նախկինում Բաթումում անցկացված «Հարավային Կովկասի առաջնությանը», որին հայաստանյան թիմերը մասնակցում էին 1998-ից ի վեր: Բաթումում անցկացվող ամենամյա մրցաշարում հայկական թիմերն ընդհանուր առմամբ չորս անգամ հաղթել են «Ի՞նչ: Որտե՞ղ: Ե՞րբ» խաղում, յոթ անգամ «Բրեյն ռինգում» և երեք անգամ «Քո խաղը» խաղերում: