Բաքուն հերթական անգամ ապացուցեց, որ հայերի առնչությամբ Իլհամ Ալիեւը հոգեբանական բարդույթ ունի

ԵՐԵՎԱՆ, 8 ԱՊՐԻԼԻ, ԱՐՄԵՆՊՐԵՍ: ԱՊՀ անդամ երկրների զինված ուժերի գլխավոր շտաբների պետերի կոմիտեի 2014թ. նիստին մեկնող հայկական պատվիրակության ընդունելությունը չապահովելու Բաքվի վարքագիծը հերթական անգամ արտացոլում է Իլհամ Ալիեւի հոգեբանական բարդույթը եւ Ադրբեջանի իշխանություն ների հատուկ քաղաքական որոշումը, որ որեւէ հարթության վրա հարաբերություն չպետք է ունենալ Հայաստանի եւ հայերի հետ:«Արմենպրես»-ի հետ զրույցում «Կովկաս» ինստիտուտի փոխտնօրեն Սերգեյ Մինասյանի գնահատմամբ, Ադրբեջանը նման վերաբերմունքով ոչ միայն հաստատում է իր ապակառուցողական դիրքորոշումն ու գործելակերպը, այլեւ քաղաքական խնդիրներ է ստեղծում առաջին հերթին իր համար: «Միջազգային հարթակներում Ադրբեջանի ներկայացրած բոլոր այն փաստարկները, որ Լեռնային Ղարաբաղի ժողովուրդը պետք է ապրի Ադրբեջանի տիրապետության տակ, ադրբեջանցիների հետ` հերթական անգամ դառնում են ոչինչ, քանի որ նման գործընթացներով Ադրբեջանի մոտեցումները փաստում են, որ Արցախի ժողովուրդը չի կարող է մեկ հարկի տակ խաղաղ ապրել ադրբեջանցիների հետ: Հաշվի առնելով նմանատիպ միջոցառումների խափանումը, սաֆարովյան գաղափարախոսությունը, միջազգային հանրությունն էլ է հասկանում, որ Ադրբեջանի ապակառուցողական քաղաքականությունն ու դիրքորոշումը ոչ միայն խանգարում են բանակցային գործընթացին, այլեւ երկու ժողովուրդների միջեւ ուշ թե շուտ հարաբերությունների հաստատմանը»,- ասաց Մինասյանը` հավելելով, որ նման գործելակերպը հատկապես օրակարգային դարձավ Իլհամ Ալիեւի նախագահության օրոք: Իսկ Հեյդար Ալիեւի նախագահության օրոք, թեպետ պատերազմը նոր էր ավարտվել, նման խնդիրներ չկային:

Ադրբեջանի նման գործելակերպն ու դիրքորոշումը չեն զարմացնում «Եվրոպական ինտեգրացիա» հասարակական կազմակերպության ղեկավար Կարեն Բեքարյանին: «Առաջին կամ երկրորդը դեպքը չէ, երբ նման բան է տեղի ունենում: Ադրբեջանը ցանկացած առիթ օգտագործում է թշնամական կեցվածք ընդունելու համար: Բացի նրանից, որ նման վերաբերմունքը խորացնում է երկու երկրների եւ հասարակությունների միջեւ անդունդը, որեւէ նպաստ չի էլ բերում դրական զարգացումների համար»,- ասաց Բեքարյանը` հավելելով, որ անհրաժեշտ է հասկանալ, թե Բաքուն կազմակերպչական առումով ինչպիսի պարտավորություն ուներ ստանձնած, եւ խախտումների առնչությամբ ինչպիսի պատժամիջոց է սահմանվում:

Բեքարյանի գնահատմամբ, նման միջոցառումների խափանումն ու հարեւան պետության նկատմամբ բացահայտ թշնամական վերաբերմունքն իրենց հետքը թողնում են միջազգային հանրության վերաբերմունքի վրա եւ հետագայում դիվանագիտական խողովակներով ներկայացվում համանախագահներին: Սակայն այս առնչությամբ էլ հետքի եւ դրանից բխող հետագա արձագանքների առնչությամբ վիճակը բավական սահմանափակ է: «Միջնորդի համար նախ աննորմալ է, որ իրերն իրենց անունով չի կոչում, սակայն մյուս կողմից կոչելու դեպքում էլ վտանգվում է նրա միջնորդական առաքելությունը: Հենց այս հակասության վրա են խաղում Ադրբեջանի իշխանությունները»:

ԱՊՀ անդամ երկրների զինված ուժերի գլխավոր շտաբների պետերի կոմիտեի 2014թ. նիստին մեկնող հայկական պատվիրակության այցը Բաքու չեղյալ է հայտարարվել: Պատճառն այն էր, որ ադրբեջանական կողմը չէր ցուցաբերել պատրաստակամություն` ապահովելու հայկական կողմի ընդունելությունը:

ԱՊՀ անդամ երկրների զինված ուժերի գլխավոր շտաբերի պետերի կոմիտեի 2014թ. նիստի նպատակն էր քայլեր ձեռնարկել, որոնք պետք է ուղղված լինեին տարածաշրջանում վստահության ամրապնդմանը: ՀՀ պաշտպանության նախարարությունը նախատեսել էր, որ հայկական զինված ուժերի պատվիրակությունը Բաքվում պետք է մասնակցի վերոնշյալ հանդիպմանը: Պատվիրակության երթուղին կազմելիս տարանցիկ գոտի է ընտրվել Մոսկվան, եւ պատվիրակության անդամները ապրիլի 7-ին ՌԴ մայրաքաղաքում էին: Թեպետ ԱՊՀ պաշտպանության նախարարների խորհրդի քարտուղարությունը, հրավերին զուգահեռ, պաշտոնական ծանուցում էր ուղարկել Ադրբեջանի պաշտպանության նախարարությանը, սակայն հյուրընկալող կողմը որեւէ կերպ չի հաստատել եւ ցուցաբերել պատրաստակամություն ու հետաքրքրություն` ապահովելու հայկական պատվիրակության ընդունելությունը: Նման վերաբերմունքի հետեւանքով հայկական պատվիրակության այցը Բաքու չեղյալ է հայտարարվել:

ՀԱՍՄԻԿ ՀԱՐՈՒԹՅՈՒՆՅԱՆ